Aleqa Hammond Siumumi siulittaasuussaaq
Aleqa Hammond ulluni qaninnerpaani Siumumi siulittaasutut inissisimalissaaq. Siumup allattaa Mikael Petersen Sermitsiamut taama paasissutissiivoq.
Allattoq Elisa Isaksen
- Malittarisassat nutaat siorna ataatsimeersuarnermi akuersissutigineqartut siulersuisuunerit landstingsgruppelu partiimi siulittaasussamik nutaamik toqqaasinnaanerannik periarfissippaat, partiip siulittaasuanik tunuartoqartillugu, Mikael Petersen oqarpoq.
Hans Enoksen nammineerluni qinersinermi ajorsarnerup kinguneri tiguai ippassarlu partiip siulittaasuatut soraarniuteqarnini tunniullugu. Siulittaasup tullerigallagaa Doris Jakobsen siulittaasuuvoq, Aleqa Hammondip ullualunnguit qaangiuppata tigusinissaata tungaanut.
Siumup tullianik ataatsimeersuarnissaa 2011-mi pissaaq.