Aleqa Hammond Siumumi siulittaasussatut sassartinneqarpoq
Taama allappoq Siumut Nuup siulittaasua Kim Godtfredsen.
Siumut Nuup taamatut sassartitsinera tapersiineralu arlalinnik peqquteqarpoq.
Siullermik, Aleqa Hammond qinikkatut ukiuni marluinnarni sulisimagaluarluni Siumut Nuummit angusaqarluarsimasutut naammagisimaarneqarlunilu maluginiarneqarpoq. Aleqa Hammond Ilaqutariinnermut Inatsisinillu Atortitsinermut Naalakkersuisuusimavoq maannakkullu Aningaasanut Nunanullu Allanut Naalakkersuisuulluni. Naalakkersuisoqarfiit akisussaaffimmik annertuumik piumasaqaateqarfiusut ukiunilu makkunanerpiaq patajaallisarlugit politikkikkut piorsaaffiusut.
Aappaattut, Aleqa Hammondimik sassartitsinermut Siumumi kinguaarit malunnaatilimmik nikikkiartuaarnerat erserseqqinniarneqarpoq, Siumut Nuummiillu tamanna Aleqa Hammondimit siuttuuffigineqarsinnaasutut qularineqanngilaq.
Pingajussaannik, Siumup politikkikkut naligiissitaanermut politikkia Aleqa Hammondimik sassartitsinikkut timitalerneqarsinnaasoq. Siumumi siulittaasuusarsimasut angutaapput maannakkullu Siumup siulittaasua aamma angutaalluni. Siumut Nuuk isumaqarpoq Aleqa Hammondimik sassartitsinermigut arnamik Siumumi siulittaasussatut piukkunnaateqarluartumik unammillersinnaalluartumillu sassartitsissalluni.
Sisamassaannik, Aleqa Hammond nunatsinniinnaanngitsoq ilisarisimaneqarpoq. Siusinnerusukkut takornariaqarnermik aallutaqarsimavoq ICC-milu atorfeqarsimalluni, taamaasillunilu nunatta avataani politikkimik suliaqarnermigut oqaatsinillu arlariinnik oqaaseqarnermigut nunarput avammut nittarsaatissallugu misilittagai annertupput Siumumi atorluarneqarsinnaasut.
Finn Heilmannip Siumumi siulittaasussatut sassarternini tunuartippaa, Aleqa Hammondillu sassartinneqarnera tapersersorlugu, taamatullu siulersuisut aalajangernerat taperserluinnarlugu. Finnip taamatut tinnersaalaarluni avammut suaaruteqaraluarnera tusaatissatut tiguarput.
