Aleqa Hammond: Sakkortuumik iliuuseqartariaqarpugut

Issittumi Siunnersuisoqatigiit Nunatta peqataaffiginngisaanik Kirunami ataatsimiileruttorput. Naalakkersuisut siulittaasuata Aleqa Hammondip Sverigip naalagaaffeqatigiinnik killiliiniarnera, taamalu Nunatta sunniuteqarsinnaaneranik killilersuinera akerliuniarfigalugu ataatsimiinnermi peqataaniarnani aalajangiuppaa.
Allattoq Mads Lynge
maajip 15-at 2013 07:31

Maanna naalagaaffeqatigiit sinnerlugit ataatsimeeqataasut tassaallutik nunanut allanut tunngasunut ministeri Villy Søvndal, Savalimmiuni naalakkersuisut siulittaasuat Kaj Leo Johannesen aamma Danmarkimi issittumut tunngasunik suliaqartartoq Klavs Holm. Aamma nunani tamalaani politikerit nuimasut peqataapput soorlu USA-mit John Kerry aamma Ruslandimit Sergej Lavrov.

Aleqa Hammondip akerliuniarluni ataatsimeeqataannginnini ima oqaatigaa:

- Sakkortuumik iliuuseqartariaqarpugut, Nunatta inuisalu annertunerpaamik sunniuteqarnissaat angujumallugu, taamatullu iliuuseqarneq tusaaneqarpoq, maluginiarneqarpoq, aammalu isumaqatigiinninniarnernut nukittunerusumik inissisimalersippaatigut, Naalakkersuisut siulittaasuata Issittumi Siunnersuisoqatigiinni ataatsimeeqataannginninni pillugu taama oqarpoq.

Villy Søvndal ataatsimiinnermi siullermik oqaaseqarnermini Issittumi Siunnersuisoqatigiit sakkortuumik isornartorsiorpai. Taassuma Kalaallit Nunaat Savalimmiullu Siunnersusioqatigiinni tusaaniarneqarneroqqullugit Canadamut kajumissaarutigaa. Danmarkip nunanut allanut tunngasunut ministeria ataatsimiinnermi oqaloreerluni Savalimmiuni naalakkersuisut siulittaasuat Kaj Leo Johannesen oqaaseqartippaa, naak taanna oqaaseqartussatut pilersaarutinut ilaanngikkaluartoq.

Issittumi Siunnersuisoqatigiit ataatsimiinneranni Kalaallit Nunaat ataatsimeeqataanngikkaluartoq, radioaviisi Kirunami tusagassiortumik malinnaatitaqarpoq. Taassuma oqaatigaa, nunat Issittumi Siunnersuisoqatigiinni alaatsinaatsutut inissisimalernissaminnik qinnuteqartut tamarmik akuerineqartut - taakkununnga Kiina ilaalluni - kisiannili Suliniaqatigiiffiit naalakkersuisunut attuumassuteqanngitsut itigartinneqartut. Soqutiginartullu ilagaat EU-p alaatsinaatsutut inissisimanissaminik qinnuteqaataa suli isumaqatigiissutigineqanngimmat. Tamatumani EU-p puisit amiinik tuniniaanissamut inerteqquteqarnera pissutigalugu Canada itigartitsisimasoq oqaatigineqarluni.