Qallunaanuku taama eqqarsartaramik kalaallit peqataatinneqarneq ajortut. Tamakku eqqarsartariaatsit taama ittangatingisut danskit qaangertariaqarpaat, Aleqa Hammond oqarpoq.

Aleqa Hammond puffassimaaqataasoq: Sooruna Trumpimik ataatsimeeqateqarnermi peqataanngitsugut?

NATO-mut tunngasunik Isumaliutersoqatigiittarfiup nunatta Savalimmiullu NATO-p ataatsimeersuarnerani peqataanissaminnut piumasaqaataat itigartippaa. 

- Isumaqarpunga danskit naalakkersuisooqatigiinnermi isumaqatigiissutertik unioqqutereeraat. Nunanut allanut illersornissamullu tunngatillugu nunatta annertunerusumik sunniuteqarnissaa neriorsuutiginikuuaat. Taamaattumik isumaqarpunga naalagaaffiup iluani ataqqeqatigiiffiusumik naligiinnerusumillu suleqatigiinnissamik oqariartortoqaraangat pissutsini ima ittuni ministeriunerup nunarput pinngitsoorani suleqatigisariaqaraa.

Nunanut allanut sillimaniarnermullu ataatsimiititaliami siulittaasoq, Aleqa Hammond (NQ), taama oqarpoq.

Danskimmi ministeriata, Mette Frederiksenip, USA-p præsidentia, Donald Trump pingasunngormat ataatsimeeqatigaa. NATO-p Londonimi ataatsimeersuarnerani naapipput – Issittorlu pillugu suleqatigiinnerulernissaq oqaluuseraat. Nunarpulli Savalimmiullu ataatsimiinnissaannut aggersagaanngillat. Aaja Chemnitz Larsenillu, IA-meersup, tamanna aamma mamiatsaatigaa. 

- Nalunngilarput Issittoq nunarpullu oqaluuserisimagaat. Tamanna akuersaarsinnaanngilarput, tullianilu pitsaanerusumik pilersaarusiortoqartariaqarpoq, Aaja Chemnitz Larsen KNR-imut NATO-p ataatsimeersuareernerata kingorna oqarpoq nangillunilu:

- Nunarput naalagaaffeqatigiinneq aqqutigalugu NATO-mi ilaavoq, taamaammat nunatsinnut tunngasutigut oqaasissaqaqataasariaqarpugut. Tamannalumi Itillermi Isumaqatigiissummi 2003-meersumi allassimavoq.

Itillermi Isumaqatigiissut

Danmarkimi ministeriunerusimasup, Per Stig Møllerip naalakkersuisullu siulittaasorisimasaata, Hans Enoksenip, Itillermi isumaqatigiissut 2003-mi atsiorpaat. Nunatta nunanut allanut sillimaniarnermullu tunngasutigut peqataatinneqarnissaa qulakkeerumallugu isumaqatigiissut taanna pilersippaat. Tamatuma kingorna Per Stig Møller nunatta nersornaasiuttagaani akimanersaannik tassa Nersornaammik guldiusumik nersornaasigaavoq, ingammik Itillermi isumaqatigiissummik pilersitsinini pillugu.

Itillermi isumaqatigiissut ima allassimasoqarpoq:

  • Nunanut allanut sillimaniarnermullu tunngasutigut Kalaallit Nunaannut attuumassutilinnik oqallinnerni Kalaallit Nunaata peqataatinneqartarnissaa sunniuteqaqataasarnissaalu pissusissamisoorpoq.

Paasissutissanik pissarsiffik: Naalakkersuisut

 

AAMMA ATUARUK Ministeriuneq Trumpip ataatsimeeqatiginera pillugu: Kalaallit Nunaat immikkut ittumik oqaluuserinngilarput

NATO-mut tunngasunik Isumaliutersoqatigiittarfimmi qullersaq, Lars Bangert Struwe, tamatumunnga isumaqataanngilluinnarpoq.

- Pakatsissalluni pissutissaqanngilaq. NATO ataatsimeersuartitsivoq, NATO-milu qullersat ataatsimeersuaqataapput. Kalaallit Nunaat Savalimmiulluunniit taakku ilaginngilaat. Mette Frederiksen Naalagaaffeqatigiit sinnerlugit peqataavoq, Lars Bangert Struwe P1 Morgenimut oqarpoq.

- Tassa imaappoq, Kalaallit Nunaanni Savalimmiunilu politikerit danskit ministeriunerat eqqissilluni sulinissaraluanut akornutaasumik nunaminnut tusagassat nipituuliutigaat. Isigineqarnertik innarlerpaat, tamannalu aarlerinarpoq – ajornarunnaarpat aggersarneqassaqqaarput – NATO-mmi ataatsimeersuarnerani peqataasinnaanngillat.  

Aleqa: Danmarki tassaannaannginnami Danmarkeeraq

Aleqa Hammond qullersap oqaaseqaatai naammagisimaanngilai: 

- Lars Banger Struwe uagut sinnerluta oqalussiinnanngilaq aamma qanoq eqqarsartugut naluaa. Qallunaanuku taama eqqarsartaramik kalaallit peqataatinneqarneq ajortut. Tamakku eqqarsartariaatsit taama ittangatingisut danskit qaangertariaqarpaat, Aleqa Hammond oqarpoq, nangipporlu:

- Danmarki tassaannannginnami Danmarkeeraq. Kisiannili savalimmiormiut aamma Kalaallit Nunaat Danmarkimut peqataapput aamma illersornissamut NATO-mut isumaqatigiissumi. Uagut inuiaat kalaallit nunatsinni NATO-mi suleqatigiinnermut amerikamiut peqataanerat annertunerpaavoq. Danmarkimiunngitsoq, savalimmiuniunngitsoq kisianni nunatsinni sakkutooqarfik pingaarnerpaaq maaniippoq. Aatsaat iluamik uagut oqaasissaqarnerutinneqartariaqarpugut. Oqaannartoqarsinnaanngilaq nakeriallaatissaqanngitsugut sinnerluta oqalussinnanngimmat.

 

KNR-ip nunanut allanut naalakkersuisoq, Ane Lone Bagger (S), oqaaseqartinniarsimagaluarpaa, iluatsinngitsumilli. NATO-p ataatsimeersuarnisssaanut aggersarneqarsimannginninni aamma kamaatigisimaneraa kamaatigineraa, Mette Frederiksenilu nunatta kissaatai pillugit NATO-p ataatsimeersuannginnerani oqaloqatigisimaneraa apererusussimagaluarparput. 

Ane Lone Bagger apeqqutivut akerusunngilai – Kim Kielsenimulli innersuuppaativut. KNR-illi apeqqutaanut aamma akissuteqanngilaq.

Mette Frederiksenip Danmarkip - Illersornissaqarfiup nunatsinni silaannakkut angallannermi nakkutilliinerulernissaanut nunallu allat aqqartartuinik nakkutiginninnermut 1,5 milliardit koruuninik aningaasaliinissaminut - pilersaarutai NATO-p ataatsimeersuarnerani saqqummiuppai. Danskillu ministeriunerata oqarnera naapertorlugu pilersaarutaat amerikamiunit akuersaarluarneqarput. 

Issittoq aarlerinarnerpaavoq

Issittoq danskit illersornissamut isumannaallisaanermullu politikkianni aarlerinarnerpaatut inissisimalernikuuvoq. Illersornissamut oqartussat isertortumik paasiniaasartuisa sumiiffiit aarlerinartut pillugit ukiumoortumik nalunaarusiaat sapaatit-akunnerata uuma siuliani saqqummerpoq - nunarpullu aarlerinarnerpaatut perngaammik inissisimavoq.

USA-p - Donal Trumpip nunatsinnik pisiarinnikumaneraaneranik USA-llu aallartitaqarfimmik Nuummi pilersitsineranik malitseqartumik - nunarsuarmi qeqertani annersaanut tassa nunatsinnut soqutiginnerujussualerneraniit ukioq ataaseq kingornagut sumiiffiit aarlerinartut pillugit nalunaarusiaq nutaaq saqqummerpoq.

Ruslandilli Issittumik aamma soqutiginninnera Issittumilu sakkutooqartitsinera, Kinallu aamma soqutiginninnerulernera USA-p soqutiginnerujussualerneranut aamma pissutaapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat