Aleqa Hammond: Politiitut atorfillit naammanngillat

Kalaallit Nunaanni politiitut atorfillit naammannersut naammannginnersulluunniit, nunatta politimesteriata Steen Thomsenip inatsisinillu atortitsinermut naalakkersuisup Aleqa Hammondip akornanni isumaqatigiinngissutigineqarpoq.

Danmarkip inatsiseqarnermut ministeria, Lene Espersen, ataatsimeeqatigeqqammerlugulu Aleqa Hammondip tusagassiortunik katersortitsinermi oqaatigisimagaluarpaa nunatsinni politiitut atorfillit amigaataasut.

Politiitut atorfillit 125-unissaat Eqqartuussiveqarneq pillugu ataatsimiititaliarsuup siunnersuutigaa, Steen Thomsenillu oqaatigaa politiitut atorfillit maanna 135-usut, tassa siunnersuummut sanilliullugu inuttaqarnerulluni.

Politiit 185-iusuuppata inuttassaqarniarneq aatsaat naammalissasoq, siorna aggustimi naalakkersuisut eqqartuussiveqarneq pillugu ataatsimiisitsimmata saqqummiunneqartoq, Aleqa Hammondip oqaatigaa.

Sullissinerit suli aamma sivisuallaartartut Aleqa Hammondip ilanngullugu oqaatigaa.

Politiitut atorfillit ikippallaarnerisa pillugit saqqummiussinerit isornartorsiuinertut tiguneqaratik, ikiuiniarnertulli tiguneqassasut, Aleqa Hammondip oqaatigaa, inatsisitigullu isumannaatsuunissaq qulakkeerumallugu suleqatigiittoqarnissaa kaammattuutigalugu.

Politiit eqqartuussisoqarfiillu aasami sulinngiffeqareernerup kingorna tamanna pillugu ataatsimiittariaqarnissaat Aleqa Hammondip siunnersuutigaa.