Aleqa Hammond: Pisuussutivut uumaatsut Kuupiup asuli pivai?
Aatsitassat Nunatsinnit oqartussaaffigineqartut, illersornissamullu sillimaniarnermullu tunngasut Naalagaaffiup akisussaaffigigai, Namminersorneq pillugu inatsimmi allassimavoq.
Oqartussaaffiilli taakku marluk imaaliallaarnarlugit immikkoortinneqarsinnaagunanngillat.
Urani matumani assersuutigineqarsinnaavoq. Aatsitassammi taassuma nunanut allanut sillimaniarnermullu tunngasunut ilaatinneqarnissaa isumaqatigiissutigineqarpoq, aatsitassammi allat qanoq inissisimappat?
Aatsitassaq imaluunniit aatsitassat illersornissamut attuumassuteqartutut qaqugukkut nalilerneqarsinnaanersut ataasiusumik suli nassuiarneqarsinnaanngitsut, Danmarkip nunanut allanut tunngasunut ministeriata Villy Søvndalip Nunanut allanut tunngasunut Folketingip ataatsimiititaliaani isumasioqatigiinnernermi qanittukkut oqaatigaa.
Pisuni ataasiakkaani pissutsit apeqqutaatillugit Nunatsinni aatsitassat Naalagaaffimmut sillimaniarnikkut illersornissakkullu qanoq attuumassuteqartarnersut nalilersuisoqartassasoq aamma oqaatigaa.
Nunatsinni aatsitassat aqunneqarnerannut atatillugu Nunatta Danmarkillu akornanni suleqatigiinnissamik isumaqatigiissusiortoqarsimasoq, atsiuinnarneqartussanngortorlu, Villy Søvndalip taamanikkut aamma oqaatigaa.
Siumulli siulittaasuata Aleqa Hammondip isumaqatigiissut apeqquserpaa:
- Danskit naalakkersuisuisa namminneq pingaartitatik aallaavigalugit illersornissamut sillimaniarnermullu apeqqutaasinnaasut imminnut pingaartissinnaasatik aallaavigalugit Nunatsinni nammineq aalajangersaassuseqarsinnaanerput innarlertarsinnaagaat, Danmarkip pisariaqartitatik naapertorlugu. Isumaqarpugullu tamanna Namminersorneq pillugu inatsimmik ataqqinninnginnerusoq, isumaqarpugullu Nunatta aatsitassat pillugit aalajangersaassuseqarnera innarlerneqassasoq, Siumup siulittaasua Aleqa Hammond oqarpoq.
Naalakkersuisut siulittaasuata Kuupik Kleistip tassunga atatillugu erseqqissaatigaa suli isumaqatigiissusiortoqarsimanngimmat, naak nunanut allanut tunngasunut ministeri Villy Søvndal taama oqaraluartoq.
- Isumaqatigiissusiornissamik suliaqarneq oqaloqatigiinnikkut siorna aasakkut aallartisarnikuuarput, mannalu tikillugu suli naammassisaqanngilagut isumaqatigiissusiornissamik. Taannalu aallaaveqarpoq Nunatta annertusiartuinnartumik nunanut tamalaanut sillimaniarnermullu politikkimik ingerlatsinera, naak Danmarkip naalagaaffiata tunngaviusumik inatsisaani Dronningi, imaluunniit Naalakkersuisut Naalagaaffeqatigiit sinnerlugit sillimaniarnermut nunanullu allanut tunngasunut politikkimik ingerlatsisussaagaluartut akuerineqarpoq Nunarput annertusiartuinnartumik tamakkununnga sunniuteqartoq, taamaattumillu erseqqissaasoqartariaqartoq qanoq inissisimanitsinnik, Naalakkersuisut siulittaasuat Kuupik Kleist oqarpoq, nangillunilu:
- Aatsitassanut aalajangersimasunut tunngasunik oqaasertaliinissamik siunertaqanngilagut, kisiannili nunarsuarmi pissutsit aallaavigalugit soorunalimi ilaanni mianersorfissaqartarpoq, sorsuffiusut imaluunniit allatigut ulorianartorsiorfigisinnaasat eqqarsaatigalugit Naalagaaffeqatigiit nunanut allanut sillimaniarnermullu politikkiat ataatsimoorussarput ilusilersortariaqarluni. Taamaattumik Nunatta qanoq tassani inissisimanissaa erseqqissartariaqartutut pisariaqartinneqartoq, Naalakkersuisut siulittaasuat Kuupik Kleist oqarpoq.
Nunatta Danmarkillu akornanni isumaqatigiissutip Inatsisartunut qinersisoqartinnagu tamanut saqqummiunneqarnissaa, Aleqa Hammondip piumasaraa.
Kuupik Kleistilli tassunga atatillugu oqaatigaa isumaqatigiissutissatut siunnersuut suli naammassineqanngimmat saqqummiunneqarsinnaanngitsoq.
