Aleqa Hammond: Pisinnaatitaaffinnik arsaarneqarsimasutut misigisimapput

Ilaqutariinnermut naalakkersuisoq Aleqa Hammond Qaanaamukaqataavoq, ilaqutariinnermut isumaginninnermullu tunngasunik suliassanik arlaqartunik nassarluni tunniussassaqarlunilu. Siullermilli tikikkamik nipikinngitsumik akerliussutsimik takutitsivigineqarnertik ima tigusimavaa:

- Soorunami naatsorsuutigisimavarput, taamatut akerliussutsimik takutitsisoqarnissaa, namminermi inuttut pisinnaatitaaffimminnik arsaarneqartutut misigisimagamik, malunnarporlu inersimasut meeqqallu aalassassimaassutigisorujussuugaat. Pingaartorujussuuvoq suliniuterput tamatta, Qaanaaq pillugu, , 2005-imili aallartinneqarsimasut 2010-p tungaanut inerlasussat, peqqissutsimut naalakkersuisoqarfiup aallartissimasaa, inuiaqatigiit maani atugassaatigut pitsanngorsaaviginissaanut siunniunneqarsimasut nalilersussuagut, pissusissamisoortumik ingerlasoqarnersoq, imaluunniit allannguisoqassanersoq nalilersorneqassaaq, Aleqa Hammond oqarpoq nangillunilu: - Qaanaap kommuneaninngaanniit kissaatigineqarnikuuvoq, Qarasaasiatigut, ilaatigut internet atorlugu oqaloqateqarsinnaalernissaq anguniarneqarpoq. Taamaasilluni ornigutinngikkaluarluni tarnit pissusaanik ilisimasalimmik oqaloqateqarsinnaaneq pisinnaalissammat. Aamma ilaqutariinnermut tuungasunik højskolertitsisoqarnissaa angorusunneqarpoq, taakkualu ataatsimiinnermi eqqartorneqassapput, Aleqa Hammond oqarpoq.