Aleqa Hammond peqquserlussimaneraavoq
Nutartigaq 17:00
Matumani pineqarput, Naalakkersuisut siulittaasuat Kuupik Kleist aamma inuussutissarsiornermut aatsitassarsiornermullu naalakkersuisoq Ove Karl Berthelsen aatsitassarsioqatigiiffiup Greengemsip siuttuini ilaquttaminnik issiatitaqartut, aatsitassarsioqatigiiffillu Naalakkersuisunit aligumik qorsooqqissumik ujaasinissamik akuersissummik tunineqarsimavoq.
- Tamanna kammalaatersornerunersoq aamma imminut iluaqutissarsiorluni peqquserlunnerunersoq apeqquserpara, tamakkumi akiorniarlugit Naalakkersuisut tusagassiuutitigut tusaqqusaarnikuummata, Aleqa Hammond Ritzauimut oqarpoq.
- Naalakkersuinikkut ileqqorissaarnikkullu akisussaassuseqarnissaq ujartorpara, Aleqa Hammond oqarpoq, aningaasarsiornikkullu soqutigisat aporaassutaasinnaasut tamarmik saqqummiunneqarnissaat piumasaralugu.
Aviâja Vandersee aatsitassarsioqatigiiffiup Greengems Aps-ip siulersuisuinut siulittaasuuvoq, taassumalu Kuupik Kleist aapparaa.
Grethe Kramer Berthelsen suliffeqarfimmi tassani pisortaavoq siulersuisunilu ilaasortaalluni aamma taanna aatsitassarsiornermut naalakkersuisumut Ove Karl Berthelsenimut nuliaavoq.
IA-p naalakkersuisuutitaqalernerata kingornagut 2009-mi oktobarimi, arnat taakku uitik taarserlugit siulersuisuni ilaasortanngorput.
Ove Karl Berthelsen ujaasinissamik akuersissuteqartoqarmat attuumassuteqarpallaarnini pissutigalugu aalajangeeqataanngitsoq, aningaasaqarnermut naalakkersuisoq Palle Christiansen Aleqa Hammondimut akissummini allappoq. Akissummi Kuupik Kleistip pisumut attuumassuteqarpallaarnera eqqaaneqanngilaq.
Pineqartoq Siumup Inatsisartut kukkunersiuinermut ataatsimiititaliamut suliassanngortinniarpaa, pappilissat suliamut pineqartut tamarmik saqqummiunneqarniassammata.
Tamanna pillugu Kuupik Kleist Radioavisimut ima oqarpoq:
- Tamanna kamanaaqaaq qasunarlunilu.
Siumup pineqartoq kukkunersiuinermut ataatsimiititaliamut suliassanngortinniarmagu, tamanna pillugu Kuupik Kleist ima oqarpoq:
- Taamaaliorniarunik taamaalioriannguarlik. Kukkunersiuinermut ataatsimiititaliamut suliassanngortitsiniarunik isumaqarpunga piaarnerpaamik taamaaliortariaqartut. Qaqilerinissamik ilimasaarutertik piaartumik aallartittariaqaraat isumaqarpunga, Naalakkersuisut siulittaasuat Kuupik Kleist oqarpoq. Taassuma Aleqa Hammondip oqaatigisai tunngavissaqannginnerarpai taamalu tamanna pillugu malersoqqitassaqannginnerarlugu.
