Aleqa Hammond: Nunarsuarmiunut akuunerulerpugut

Nunat tallimat Issittumut qanittut tusagassiortut nunarsuarmi assigiinngitsuneersut najuuffigisaannik ilulissani ataatsimeersuarneratigut Nunatta nunarsuarmiunut akuunera qulakkerneqarpoq. Avannaarsuata sikuerukkiartuinnartuni angallaffigineqaleraluttuinnarfiani ilisimaneqassaaq, nuna manna inoqarmat ataqqineqartariaqartunik. Aningaasanut nunanullu allanut naalakkersuisoq, Aleqa Hammond taama naliliivoq.
Allattoq Jens Thorin
maajip 29-at 2008 12:08

- Nunatta Danmarki suleqatigalugu nunarsuarmioqatigiinnut takutippaa, oqaluuserissassanngortitaminik saqqummiilluni nunarsuarmioqatigiinnik ataatsimoortitsisinnalluni, Ale Hammond oqarpoq.

- Nunat tamat issittoq pillugu politikkertik aaqqissorpaat, uagullu pingaartipparput ilisimaneqasasoq, nuna manna inoqanngitsutut aammalu piumasaannarmik iliorfittut pineqassanngimmat. Inoqarpoq, ataqqisarialinnik ukiorpassuarnilu misilittagaqartunik. Taakkua pingaartinneqarluinnarlutik allatulli naleqarlutik oqaloqatigineqassapput, nunanut allanut naalakkersuisoq oqarpoq.

- Nunat issittumiittut Ilulissani ataatsimeersuarnerat aamma Issittumi isunnersuisoqatigiinni sulinermi Naalakkersuisut atussuaat, Aningaasanut nunanullu allanut naalakkersuisoq Aleqa Hammond naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq