VIDEO Aleqa Hammond Nunarput pillugu ataatsimiititaliami siulittaasunngortoq
Aleqa Hammond, Folketingip Kalaallit Nunaat pillugu ataatsimiititaliaani ullumimiit siulittaasunngorpoq.Tusagassiuutinut nalunaarummi nassiunneqaqqammersumi tamanna atuarneqarsinnaavoq.
Allattoq Mads Lynge
decembarip 15-at 2016 11:00
Ataatsimiititaliami siulittaasunngorneq partiip Venstrep oqaloqatigereerneratigut pisoq Aleqa Hammondip nalunaarutigaa.
- Danskit siunissami ministeriuneqartarneranut apeqqut pillugu Venstrekkormiut oqaloqatigisimavakka aamma erseqqissaassuteqarlunga Nunatta nammineq pingaarnersiuisarnera anguniagaalu ataqqilluinnarneqartariaqartut, Aleqa Hammond oqarpoq, nangillunilu:
- Taamaammat oqaloqatigiinnerit pereernerini Venstre isumaqatigiissuteqarfigaara Folketingimi Nunarput pillugu ataatsimiititaliami siulittaasunngussasunga, Aleqa Hammond oqarpoq.
NUTARTIGAQ: KNR-imit Aleqa Hammondip Nunarput pillugu ataatsimiititaliami siulittaasunngornera pillugu apersorparput.
