Aleqa Hammond: Josef Motzfeldtip tunuarniannginnera akuersaanngerujussuarparput
Inatsisartut siulittaasuata Josef Motzfeldtip angerlarsimaffiani ikiaroornartumik nassaartoqarnera pillugu politiinit suliarinnittoqarnerani Josef Motzfeldtip ataatsimeeqataasannginnissaa Inatsisartut siulittaasoqarfianni aalajangerneqarpoq. Tamanna Siumumit naammagineqanngilaq, politiinit naliliisoqarnissaata tungaanut Josef Motzfeldtip tunuarallartariaqarnera piumasarineqarluni.
Allattoq Mads Lynge
juulip 10-at 2009 16:18
- Inatsisartuusugut toqqissisimanarinngilluinnarparput siulittaasorput ikiaroornartumut pasineqartoq issiavimmini issiaannassappat. Inuiaqatigiit kusanartumik ataqqinassuseqartumillu sullinneqassappata, toqqissisimatinneqassappatalu Siumumit piumasaraarput Inatsisartut siulittaasuat Josef Motzfeldt, Inuit Ataqatigiinneersoq ingerlaannartumik atuutilersumik suliap politiilersuutaasup naammassineqarnissaanut tunuarallartariaqartoq, ataatsimeeqataanngilaaginnarneq akuerineqanngilaq, Siumup siulittaasua Aleqa Hammond tusagassiuutinut allappoq.
Josef Motzfeldt suliamut tunngatillugu unnerluussaanngilaq. Suliaq sumut killinnersoq politimesteriugallartoq Bjørn Bay aperaarput, annertunerusumilli oqaaseqarsinnaannginnerarpoq.
