Aleqa Hammond: Inuiaqatigiinnut pingaaruteqartut arlallit ilaatinneqanngillat
- Oqaatsit aalajangersimasut maqaasivakka, tassalu inuussutissarsiuteqarneq oqallisiginiartillugu nunalerineq oqaasertalersorneqanngilaq. Oqaaseq "nunalerineq" ataasiarluni atorpaa. Inuussutissarsiut pingaaruteqaqisoq annertusiartuinnartorlu pingaartinngippallaartorujussuartumik oqariartuutigaa. Aamma nunarsuarmiut aningaasakilliornerat annertunerusumik piareersaaffigisutut oqariartuutiginngilaa. Selskabit avataaninngaanneersut qanoq iliuuseqarnerat oqaluttuaraa, Nunattali nammineq aningaasaqarniarnikkut qanoq iliorsinnaanera oqariartuutiginagu, Aleqa Hammond oqarpoq.
Kalaallisut oqaatsitta pisortatigoortunngorsimanerat pillugu Kuupik Kleistip erseqqissaassuteqannginnera, Aleqa Hammondip aamma eqqaavaa, soorlu aamma Nunatta nunanut allanut tunngasunut politikkianik qanoq iliornikkut nukittorsaasoqarniarnersoq, Siumup siulittaasuata maqaasivaa, aalisartullu akitsuutitigut iliuuseqarfiginiarneqarnerat malugisimallugu:
- Aalisarnermut tunngatillugu ullumi tusaasara tassaavoq aalisartut akileraarusersuiffigineqarnissaat. Allatulli pitsanngorsaaviginiarneqarnissaanut siunnersuutinik tusagaqarnata. Tassa taakkuupput maannakkoqqissaaq maluginiakkakka pingaarnerit. Soorunalumi atuarluaqqissaariarutsigu qularnanngilaq aamma allanik oqaasissaqarumaarpugut. Siumut amerlasuutigut isumaqataavoq, isumaqatigiinngissutinik aamma peqarpoq, Siumup siulittaasua Aleqa Hammond oqarpoq.
