Aleqa Hammond: Inatsisitigut ataataqanngitsut immikkoortinneqarput
Inatsisitigut ataataqanngitsut taarsiivigineqarnissaanik suliaq qallunaat naalakkersuisuisa itigartitsissutigisimasaat Naalakkersuisut Siulittaasuata tunniutiutiinnarfigerusunngilaa. Naalakkersuisut Siulittaasuat Aleqa Hammond massakkut Københaviniippoq, qallunaat naalakkersuisui suliaq pillugu isumaqatiginiarniarlugit.
Aleqa Hammond ullaaq Københavnimi tusagassiortunik katersortitsivoq. Pingaarnertut marlunnik saqqummiussivoq.
- Siullertut, ministeriunerup aalajangiusimaannarpaa inatsisitigut ataataqanngitsut ataataasut toqoreersimasut kingornussisinnaanissaanut periarfissat oqaluuseriniarnagu. Aappaattut, erseqqissaatigivarput maannakkut inatsisissap oqaluuserineqartussap iliuuseqarfigineqanngippat inuiaqatigiinnut kalaallinut ilaannut immikkoortitsinermik nassataqartussaasoq. Taamatut aalajangerneq nunatsinni Naalakkersuisuiniit Inatsisartuniillu akuerineqanngitsoq oqaatigaarput, Naalakkersuisut siulittaasuat Aleqa Hammond oqarpoq.
Taanna isumaqarpoq Qallunaat Naalakkersuisuisa inatsisitigut ataataqanngitsut pillugit suliaq suli naammassinngitsoq suliatut naammassinnissimanerarnerat, nunatsinni innuttaasut ilaannut inatsisitigut immikkoortinnerusoq.
- Tupigusuutiginanngitsuunngilaq ullutsinni 2014-imi nunat tamalaani akornatsinni pisinnaatitaaffinnik pingaartitsitsinerup nalaani Danmarki naalagaaffittut aalajangiusimannimmat nunatsinni innuttaaqataatitta ilai inatsisitigut immikkoortissallugit, Aleqa Hammond oqarpoq.
Inatsisitigut ataataqanngitsut pillugit suliaq qallunaat naalakkersuisuiniit tusaaniarneqanngippat, nunatta naalakkersuisui iliuusissanik nutaanik ujarlerniarlutik aalajangiusimapput.
- Aalajangiusimaannassappagu inatsisitigut ataataqanngitsut ataataasut toqoreersimasut kingornussisinnaatitaaffeqanngitsut pillugit suliaq allatut ilusilersortariaqassaneripput isumaliutersuutigalugu aallartissaagut.
Aleqa Hammond isumaqarpoq suliaq naammassineqassappat qallunaat nunattalu naalakkersuisui isumaqatigiissuteqaqqaartariaqartut.
Aleqa Hammond Københavniliarnermini suliassatut siullertut tusagassiortunik katersortitsivoq. Suliassamilu tulleraa statministeri Helle Thorning-Schmidt naapinniassallugu.
- Folketingimi ilaasortat aamma Kalaallit Nunaanni tunngassuteqartumi ataatsimiititaliaq naapittussaavara.
Taakkualu isumaliutissiissusiornerannut tunngatillugu naalakkersuisuini peqqusinissaq qanoq nukittunerpaaffissaaniissinnaanersoq suleqatigiissutigissavarput isumasioqatigiillutalu. Maaniinnera atorlugu ministeriuneq kajumissaarpara naapissasugut oqaloqatigiissasugullu nunatsinni inatsisitigut ataataqanngitsut pillugit suliaq ilungersornitsinni minnerpaamik tusaqqulluta, Naalakkersuisut siulittaasuat Aleqa Hammond oqarpoq.
