Aleqa Hammond: ICC-p tupaatigisinnaanngilaa

Nunatta karsiata ICC-mut tapiissutigisartagaasa 2018-ip tungaanut, ukiut tamaasa 1 million koruuninik ikiliartortinneqarnissaanik Naalakkersuisut aalajangiinerat, ICC siulittaasuata, Aqqaluk Lynge-p tupaatigisinnaanngikkaa, Naalakkersuisut siulittaasuata, Aleqa Hammondip oqaatigaa.

ICC-p ukiut tamaasa 5,2 million koruuninik taperneqartarunnaarluni imminut ingerlattunngornissaa, politikkikkut aalajangiinermi takornartaannbgitsoq, Aleqa Hammond oqarpoq.

- ICC-mut tapiissutit atorunnaarsikkiartuaarneqarnissaat 2008-imili aningaasanut inatsimmut atatillugu oqallisigineqartarpoq, aammalu Naalakkersuisunit siulitsinnit, tassa Inuit Ataqatigiinnit, Demokraatinit aamma Kattusseqatigiinnit 2010-imi, 2011-imi aamma 2012-imi siunnersuutigineqartarluni.

ICC Canada aamma ICC Alaska nunami namminermi aamma nunani tamalaani pisussanut pilersaarutinut aningaasaateqarfinnullu qinnuteqaateqarnermikkut annertoorujussuarmik namminneq ingerlataminnut matussusiisarput, Aleqa Hammond oqarpoq imalu nagilluni.

- ICC-p suliamik taamaattumik ingerlatsisarnermi ukiorpassuarni pitsanngorsaasinnaasimavoq, taamaattumillu ICC-ip tamanna tupaallaatigisinnaanngilaa, Aleqa Hammond oqarpoq.

ICC-p siulittaasuata, Aqqaluk Lynge-p KNR-imut ippassaani oqaatigaa, Aningaasanut Inatsimmit ICC taperneqartarnerisa ikiliartortinneqarneranni, ICC-p Kalaallit Nunaanni immikkoortortaa matuneqariaannaasoq aamma ICC-p Inuuvimmi ukioq manna ataatsimeersuarnissaanut, ICC-p Kalaallit Nunaanni immikkoortortaqarfianit peqataasoqannginnissaa ernummatigineqarsinnaasoq.

Ataatsimeersuarnissamut peqataatitaqannginnissamik sioorasaarineq, Aleqa Hammondip ima akissuteqarfigaa.

- ICC Kalaallit Nunaat ataatsimeersuarnermut peqataanissamut immikkut ittumik 100.000 koruuninik qinnuteqarpoq aamma Nunanut Allanut Pisortaqarfiup Nunanut allanut kontuanit aningaasaliiffigineqarluni, Naalakkersuisut siulittaasuat, Aleqa Hammond oqarpoq.

ICC Kalaallit Nunaannit ilisimatitsissutigineqarpoq ataatsimeersuarnermi peqataanissamut missingersuutit 2,2 millioner koruuniusut.