Aleqa Hammond EU-mi oqalugiassaaq

Siumup siulittaasua, Aleqa Hammond, immikkut qaaqqusaalluni, Bruxelles-imi isumasioqatigiinnermi pingaarnerit ilaattut oqalugiartuussaaq.
Allattoq Apollo Jeremiassen
oktobarip 11-at 2010 15:10

Isumasioqatigiinnermi qulequtaritinneqarpoq, silaannaap allanngoriartornera taassumalu avatangiisinut aningaasarsiornikkullu kingunerisai.

Prince Albert aappaata, Monaco-meersup, aningaasaateqarfia isumasioqatigiinnermut aaqqissueqataavoq. Taakkua saniatigut International Polar Foundation aamma The Aspen Institut aaqqissueqataallutik. Isumasioqatigiinnermi tusarnaartussat inuit pingaaruteqartuupput.

Aleqa Hammondip oqalugiutissaasa ilagaat, nunatta qangaaniilli nunatut periarfissaqarpianngitsutut isigineqarnera allanngoriartortoq nunarsuarmioqatitsinnit maluginiarneqarsimammat. Silap allanngoriartornera ilutigalugu nunatta periarfissaat aamma allanngorput, ineriartorneq aamma aningaasarsiorneq eqqarsaatigalugit. Silap allanngoriartornerata nassataasa ilagaat, kulturitta aamma inuuriaasitta qularnanngitumik allanngoriartornissaat. Ilaatigut tamakkuupput Aleqa Hammondip oqalugiaatissai.

Isumasioqatigiinneq pissaaq oktobarip 14-anni aamma 15-anni, ingerlanneqassalluni EU-p qitiusumik ataatsimiittarfissuani Bruxelles-imiittumi. Nunatsinnit qinikkatut kisiartaalluni Aleqa Hammond isumasioqatigiinnermi peqataassaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq