Aleqa Hammond: Aqaguagu namminiilivilernavianngilagut
Naak Naalagaaffeqatigiinnermi ilaasortaajunnaarnissamik oqaatsit qineqqusaarnerup nalaani saqqummiunneqaraluartut, Naalagaaffeqatigiinnermit ingerlaannartumik ilaasortaajunnaarnissamik oqariartuutaanngitsut, Siumup siulittaasuata erseqqissaatigaa:
- Qinersinermi ajugaassagaluarutta imaanngilaq aqaguaguani namminiilivissasugut, Aleqa Hammond oqarpoq.
- Namminersorneq pillugu inatsit Nunatsinnut qanoq nassataqarnersoq qallunaat politikeriisa aamma ilisimavaat, taamaattumik politikimerimut kimulluunniit Namminersorneq pillugu inatsimmik ilisimaarinnittumik nutaarsiassaasussaanngilaq, Siumup siulittaasua Aleqa Hammond taama oqarpoq.
- Statsministerip ilisimavaa, uagullu tamattaalluta aamma ilisimavarput Nunatta naalagaaffinngoriartornissaanut aqqutissat erseqqarissut suunersut. Nunattalu pisinnaatitaaffii suunersut Namminersorneq pillugu inatsimmi erseqqarissorujussuuvoq. Nunatta Danmarkillu isumaqatigiinniarnissaani tamanna tunngavigineqartussaavqo, Aleqa Hammond oqarpoq.
Nunatta Danmarkimut imaluunniit Naalagaaffimmut siunissami attaveqarniarnerata ilusissaa Namminersorneq pillugu inatsit aallaavigalugu qaquguussagaluarnersoq isumaqatigiinniutigineqartussaassaaq, qanorli iluseqassanersoq Aleqa Hammondip sukumiinerusumik iserfigerusunngilaa:
- Namminiilivittunngoraluaruttaluunniit Danmarkimut arlaatigut attaveqartuaannassaagut, oqaluttuarisaanitta tamanna takutippaa, attaveqaqatigiinnermili periarfissat assigiinngitsut Siumumi ukiorpassuarni oqallisigisarpavut. Danmarkimit avissaarluta Naalagaaffeqatigiinnermit anissanersugut oqallisigisarparput, free associationimilli taallugu Nunarput namminiilivissanersoq aamma oqallisigisarlutigu, Aleqa Hammond oqarpoq.
Free associationimik taallugu namminiliivinneq tassaavoq illuatungeriit pituttorsimanatik traktatimik, imaluunniit isumaqatigiilluni aalajangersakkamik atsioqatigiinnerisigut attaveqaqatigiinneq.
Nunarpulli aningaasarsiornikkut imminut aatsaat napatissinnaalerpat Danmarkimit avissaarsinnaanissaq pillugu isumaqatigiinniartoqarsinnaalissasoq, Aleqa Hammondip erseqqissaatigaa:
- Siumup siunnerfia qineqqusaarnermi erseqissaassutigisarparput. Partiip siunertaani § 8 innersuussutigiinnarsinnaavara, tassa inuiaqatigiit aningaasaqarnikkut polikkikkullu nammineersinnaassuseqarsinnaasut pilersinneqarnissaat siunertarigatsigu. Taassuma namminerisamik takutippaa inatsisiliornivut aningaasaqarnivut Danmarkimut apeqqutaatikkunnaariartortinneqassasut, tamannalu qangarsuaaniilli partii pilersinneqarmalli anguniagaraarput, Aleqa Hammond oqarpoq.
