Aleqa Hammond: Aporaanniartuunngilagut

Aleqa Hammond isumaqanngilaq Siumukkormiut inatsisartuni kisimik oqaatsinik sakkortuunik atuisartut:

- Isumaqarpunga sakkortuumik tamatta nipeqartugut, inatsisartuni naalakkersuisunilu. Inatsisartuni suleriaaserineqartartoq malillugu sulivugut, atugassiissutigineqartullu naapertorlugit iliuuseqartarluta, Aleqa Hammond oqarpoq.

Atassutip Siumumik teknikkikkut suleqatiginninnini ataasinngormat unitsippaa. Atassutip siulittaasua isumaqarpoq, Siumut sakkortuallaartumik Inatsisartut oqaluttarfianniit oqaluttarsimasoq.

Inatsisartut siulittaasuata, Josef Motzfeldtip aamma maluginiarsimavaa Inatsisartuni oqalliseriaaseq ilaatigut akuerineqarsinnaasup killerfianiittaartoq.

- Oqaluttarfiit Nunatsinni ataqqinarnersaat atorneqartarpoq, Inatsisartunit Naalakkersuisunullu ilaasortanik pikkorlunnerarlugit, Josef Mozfeldt ataasinngormat taama oqarpoq.

Kisianni Aleqa Hammond isumaqanngilaq Inatsisartut qangamut naleqqiullugu oqaluttarnertik sakkortunerulersissimagaat:

- Politikkimi angusaqarusussuseqarnermi sakkortuuliorsinnaaneq aallaaveqanngilaq sakkortuniaannarluni sakkortuneq. Kisianni politikkikkut sunniuteqarnissaq erseqqissaassuteqarnissarlu Siumumiit pingaartutut isigaarput, Aleqa Hammond oqarpoq.

Naalakkersuinermut pissutsinik ilinniagartuup Jakob Janussenip Siumut uparuarpaa, isumaqarluni Siumup illuatungiliuttunngorsimanini suli paasisimanngikkaa.

Kisianni Aleqa Hammond isumaqarpoq, suli sungiunneqarsimanngitsoq allaanerusumik illuatungiliuttoqalersimasoq, illuatungiliuttarsimasuniillu allaniit allaanerullutik.

- Qinersinerup inernera sulinitsinnut aaliangiisuulluinnartuuvoq. Qinersineq tassaasarpoq inuiaqatigiinniit pisussaaffimmik tunisisoq. Aamma taanna pisussaaffik ataqqillugu pisussaaffimmi sulivugut. Naalakkersuisooqatigiinniikkaluarutta iluatungiliuttuugaluaruttaluunniit, pisussaaffik inuiaqatigiinniit tunniunneqartoq ataqqillugu inissisimaffipput aallaavigalugu sulivugut, Aleqa Hammond oqarpoq.

Kisianni aamma illuatungiliuttutut periaatsit nutaat atulersimasut Aleqa Hammond ersarissaavoq:

- Ersarissumik nipi illuatungiliuttuninngaanniit siornatigut sungiusimaneqanngitsoq pissutsini Nunatsinni pisunik oqariartorsinnaaneq siornatigut sungiusimaneqanngilaq, aamma qularnanngilaq maannakkut ippigineqarsinnaammat, Aleqa Hammond naggasiivoq.