Aleqa Hammond aningaasaqarnermut naalakkersuisunngussaaq

Naalakkersuisuni akisussaaffeqarfiit juulip aallaqqaataaniit atuutilersussamik allannguiffigineqartussanngorput.

Aleqa Hammond, Siumumeersoq, aningaasaqarnermut nunanullu allanut tunngasunut naalakkersuisunngussaaq. Naalakkersuisut siulittaasuata Hans Enoksenip tamanna nalunaarutigeqqammerpaa.

Aleqa Hammond ulloq manna tikillugu ilaqutariinnermut inatsisinillu atortitsinermut naalakkersuisuuvoq.

Aleqa Hammondip naalakkersuisuuffigisai avinneqassapput allamullu agguataarneqassallutik.

Kultureqarnermut, ilinniartitaanermut, ilisimatusarnermut, ilageeqarnermullu naalakkersuisoq Tommy Marø, Siumumeersoq, maanna naalakkersuisuuffigisami saniatigut ilaqutariinnermut naalakkersuisunngussaaq.

Inatsisinik atortitsinermut naalakkersuisoqarfik naalakkersuisut siulittaasuannit Hans Enoksenimit akisussaaffigineqalissaaq.

Naalakkersuisut taamatut inissillutik qinersinissap tungaanut taamatut ingerlaannassasut, naalakkersuisut siulittaasuata Hans Enoksenip oqaatigaa.