Aleqa Hammond: Akitsuutinik qaffaanissaq qinerparput amerlanerussuteqartut qinermassuk

- Naalakkersuisut pisussaaffigimmassuk 100 millioni koruuninik isertitaqarnerunissaq akitsuutinik qaffaanissaq qinerparput, tamanna politikkikkut amerlanerussuteqartut qinermassuk, taama oqarpoq Aningaasaqarnermut naalakkersuisoq, Aleqa Hammond, akitsuutinik qaffaanermut akerliusorpassuarnut.
oktobarip 24-at 2007 13:25

Tupat, sukkut imigassallu aalakoornartortallit akitsuutaasa qaffannissaat naalakkersuisoqatigiit Siumukkut Atassutikkullu ataatsimik amerlanerussuteqaqqalaarlutik aalajangerpaat.

Aleqa Hammond oqarpoq, Inuit Ataqatigiit akissarsiaqqortunerit akileraarnerusalernissaannut siunnersuutaat, Demokraatillu sipaaruteqarnissanut isertitaqarnerunissamullu siunnersuutaat, amerlanerussuteqartunit akuerineqarsinnaanngimmata akitsuutinik qaffaanissaq Naalakkersuisut qinersimagaat.

-Naalakkersuisuni ilisimavarput akitsuutinik qaffaagatta ajornartorsiutit peerunnavianngitsut. Neriuutigaarali akitsuutinik qaffaanerput atuinikinnerulernermik kinguneqarumaartoq, Aleqa Hammond oqarpoq.

Aleqa Hammondip ajuusaarutiginerarpaa akitsuusiineq nioqquteqartunut nioqqutissiortunullu kinguneqarnerlussinnaammat, oqarporli, allatut ajornartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq