Aleqa Hammond: Akisussaassusilittut misigisimagama tunuarpunga

- Isumaqarpunga ullumi ulloq uannut piffissaasimasoq naalakkersuisut siulittaasuannut nalunaarutigissallugu, Aningaasaqarnermut Nunanullu allanut Naalakkersuisutut ullumimiit atuutilersumik tunuarlunga, Aleqa Hammond aallartippoq.

Inatsisartut aningaasanut inatsisissaannut siunnersuut 2009-moortoq upernaarli suliarineqalermat, siunniussimasat uniuuttumik ingerlasimanerarpai.

- Ajunngitsumik inerneqarnissaa sapinngisara naapertorlugu peqataaffigaara, amigartoorutit killilersimaarfigineqarnissaannut tunngatillugu sorsussimallunga, taamaakkaluartoq aarlerisaarutigisimasakka tusarneqarsimanngillat, oqarpoq nangillunilu.

- Maannakkut amilaarutigisimavara Nukissiorfiit akitieselskabinngortinneqassanngikkaluarpat aningaasanut inatsimmut ikkutereersimannginnerata kingunerisaanik amigartooruteqarnissarsuaq, naalakkersuisunit allanit annerusumik pingaartorsiutigineqanngitsoq. Akisussaassusilittut misigisimagama nunatta aningaasaataasa taamatut aqunneqarnerat peqataaffigisinnaanngilara, Aleqa Hammond erseqqissaavoq, oqarluni eqqarsarnartoqartitani Nukissiorfimmut tunngasuinnaanngitsut.

- Ukiut arlalinngorlugit amigartooruteqarneq annertusigaluttuinnartoq nunatta karsiata nammassinnaanngilaa. Inuiaqatigiit akissaqartariaqarput ukiuni aggersuni pilersugassagut amerliartortussaammata. Akisussaassuseqartuullunga nalunagulu sumut ingerlasoq peqataaffigisinnaanngilara illersorsinnaanagulu amigartooruteqarfiusoq taama annertutigisoq, oqarpoq.

Aleqa Hammond kingullermik inatsisartunut 2005-imi novembarimi qinersisoqarmat parti Siumut sinnerlugu qinigaavoq, kingornalu Aningaasaqarnermut Nunanullu Allanut naalakkersuisunngorluni.

-Inatsisartunut qineqqusaarnikuuvunga inuiaqatigiinni suleqataasinnaallunga nukissakkalu inuiaqatigiinnit atorneqarsinnaasutut misigigakkit. Inuiaqatigiit atugassat pitsaanerusumut ujartussallugit, inatsisartutut suliassakka ingerlatissavakka, Aleqa Hammond naggasiivoq.

Naalakkersuisut siulittaasuat Hans Enoksen inatsisartut oqaluttarfiatigut nalunaaqutaq tallimanngulersoq Aleqa Hammondip tunuarnerminik nalunaarutaa tigusimallugu uppernarsaavoq. Ilisimatitsissutigaa ulluni tulliuttuni kina atorfimmut ivertinneqassanersoq nalunaarutigineqarumaartoq, tungaanullu nammineq naalakkersuisut siulittaasoqarfimmi Aningaasaqarnermut Nunanullu allanut Naalakkersuisoqarfiup akisussaaffii tigummissagai.