Aleqa Hammond ajunngitsumik oqaluttoqarnissamik kaammattuuteqarpoq
Naalagaaffeqatigiit akornanni ajunngitsumik nipeqarluni suleqatigiinnissaq Folketingemi ilaasortap Aleqa Hammondip kaammaattuutigaa, taamaaqqissaanngilarli.
Taama kaammattuuteqartoqarpoq folketingemi naggataarnersiorluni oqallittoqarnerani Venstret Kalaallit Nunaannut oqaaseqartua Marcus Knuth apeqquteqareersorlu.
AAMMA ATUARUK Kalaalivik kinaava?
Kalaallit Nunaata Danmarkillu akornanni attaveqatigiinnerup nukittunerulernissaa anguniarlugu inuusuttunut qanoq iliuuseqarnissaq takorloorneqarpa, naalagaaffeqatigiinnerup nukittuup attatiinnarneqarnissaa eqqarsaatigalugu, tamanna Danmarkimut Kalaallit Nunaannullu iluaqutaasumik, Marcus Knut Venstreneersoq taama aperivoq, Aleqa Hammondilu ima akivoq
Kalaallit namminersulivinnissamik kissaateqarnerat apeqqutaatinnagu nalagaaffeqatigiinni nipi ajunnngitsoq atorneqartariaqartoq isumaqarpunga, allamik aalajangiisoqartinnagu, Aleqa Hammond taama oqarpoq.
Aleqa Hammond Kalaallit Nunaata namminiilivinnissaa pillugu aamma Danmark Kalaallit Nunaanni pissutsinut akuliukkaangat sakkortuumik qisuariartarpoq.
AAMMA ATUARUK Aleqa: Sakkortuumik oqallinneq Kuupiup akuerisariaqarpaa
Aviisimi Informationemi 2013-mi allaaserisami ilaatigut Aleqa Hammond ima oqarpoq, " Danmarkimit ataatsimoortumik tapiissutinik pinngitsuuisinnaanera nuannarinngilara. Danmark qinnuiginikuunngilarput nunasiaatigilissagaatigut erfalasortillu amullugu " Aleqa Hammond taamani taama oqarpoq.
Ajunngitsumik nipeqarluni oqalunnisamik Aleqa Hammondip kaammaatuuteqarnera Inuit Ataqatigiit Folketingemi ilaasortaatitaanit qisuariarfigineqarpoq, folketingemi naggataarutaasumik oqallittoqarnerani Aleqa Hammondip siusinnerusukkut oqaaserisimasani suli aalajangiusimanerai apeqqugineqarmat.
- Folketingemi ilaasortap Aleqa Hammondip siusinnerusukkut oqaaserisimasani pakatsissutigineraa tusarusukkaluarpara, tassami politikeriusugut ajunngitsumik nipeqarluta oqalunnissatsinnut maligassiuisussaagatta, Aaja Chemnitz Larsen folketingemi naggataarnersiorluni oqallinnermi sisamanngornermi taama aperivoq.
- Kalaallit Nunaat namminersortoq pillugu siusinnerusukkut oqaaseqartarninni qallunaaluartutut isumaqarsorineqartarpunga - aammalumi tamanna pineqartillugu sakkortuumik oqaluttarpunga tamannami kissaatigigakku kisianni qallunaaluartutut paasineqassanngilaq, Aleqa Hammond oqarpoq.
AAMMA ATUARUK Naalagaaffeqatigiinnerput atatiinnassavarput
Tassunga atatillugu Aleqa Hammondip erseqqissaatigaa, isumaqatigiissutigineqartut aalajangiusimaneqarnissaat.
- Assersuutigalugu Namminersorneq pillugu inatsit. Inatsit taanna malinneqarpat Kalaallit Nunaata Danmarkillu akornanni pisariaqanngitsumik aporaattassanngikkaluarpoq, Aleqa Hammond oqarpoq.
Aleqa Hammondip oqaloriaatsiminik allanngortitsineratut Aaja Chemnitz Larsenip paasivaa.
- Siusinnerusukkut oqaaserisarsimasaamisut sakkortutigiunnaarsimasutut paasivara, Aaja Chemnizt Larsen oqarpoq.
Taamaaqqissaanngilarli, Aleqa Hammond akissuteqarluni erseqqissaavoq,
- Siusinnerusukkut oqaatigisarsimasannit sakkortutigiunnaarnermik naatsorsuutigineqarsinnaanngilaq, isumakka siusinnerusukkulli isummiussimasakka aalajangisimavakka tamannalumi erseqqissorujussuuvoq, Aleqa Hammond oqarpoq.
AAMMA ATUARUK Naalagaaffeqatigiinnit aninialersaanngilagut
