Aleqa: EU Nunatsinnut siunissami suli pingaaruteqassaaq

EU-mi Inatsisartunut sapaatiuppat qinersineqartussaavoq. Tamanna Nunatsinnut toqqaannartumik attuumassuteqarsinnaasorinanngikkaluartoq, taamaattoq EU-mik suleqateqarnerput arlalitsigut sunniuteqartarpoq, ilaatigut ilinniartitaanermut aalisarnermullu tunngasutigut.
maajip 23-at 2014 11:13

EU-mit Nunarput aningaasatigut taperneqartarpoq, tamanna qujanaraluaqisoq taamaattoq, Nunatsinnut arfattassiissutit amerlineqarnissaannut politikkikkut anguniagaqarneq imaannaanngitsuuvoq aamma puisit amiisa EU-mut eqquteqqusaajunnaarnerisa kinguneranik piniartut aningaasarsiorniarnerat ilugersunartorsiortinneqarpoq.

Pissutsit ilaatigut taamaattut pillugit, Naalakkersuisut siulittaasuat, Aleqa Hammond radioaviisimit naliliisipparput.

- Nunatsinnut tunngatillugu eqqaamaneqartut annerppaat ilagaat, puisit amiisa EU-mut eqquteqqusaajunnaarnerannut tunngassuteqartoq. Kisianni taassuma saniatigut aamma pingaaruteqarpoq eqqaassallugu, arfanniartarneq pillugu uangut nungusaataanngitsumik piniarsinnaanitsinnik, EU-mi nunanit tapersersorneqarnissamik sulinissaq. Kisiannili taama oqareerlunga, pingaaruteqarluartutut taarusuppara, EU-mi qiningaasussat Nunatta pisariaqartitaanik aamma politikkikkut pingaartitatsinnik oqariartuutigisartakkatta paasineqarnissaanik sulinissaq pingaaruteqarluinnartutut oqaatigisariaqarakku, Aleqa Hammond oqarpoq imalu nangilluni.

- Taamaattumik EU-mi qinikkat nutaat inisseriarpata, naatsorsuutigineqassaaq Nunatsinni pingaartitatsinnik taakku ilisimasaqalernissaannik qanoq iliuuseqarnissarput. Taamaaliussaagut aningaasatigut iluaqutigisinnaasagut kisiisa pinnagit aamma EU-mit aaljangiussat naapertuilluartuunngitsut aaqqiivigineqarnissaannik, EU-p pisussaaffigisaannik eqqaasitsinissarput. Aleqa Hammond oqarpoq.

EU-p Inatisartuini qinigaasussat assortuuttumik EU pillugu isummersulersinnaaneranni tamanna Nunatsinnut aningaasatigut akornusiisinnaalluarpoq. Aalisarnermut ilinniartitaanermullu EU-mit, ukiut sisamakkaarlugit tapiissutigineqartarput aningaasat katillugit 1,6 milliardit koruunit. Tamannalu isumaqatigiissut 2020-p tungaanut atuuttuulluni.

- Tamassuma ingerlateqqiinnarneqarnissaanik soorunami kissaateqarpugut, tassami suli nukittunerusumik inissisimanissarput kissaatigigatsigu. Kisianni tassa tamanna suliassaavoq nukinnik atuiffiusussaq kisiannili imminut akilersinnaalluartoq, Naalakkersuisut siulittaasuat oqarpoq.

EU-mi Inatsisartunut qinersinermi, Nunatsinnit annilaanngatigineqarsinnaasut marluupput, tassa EU-p ataatsimuulernissaannik illersuisut partiit talerperlerpaaneersut aamma EU-p ataatsimuulernissaanik akerliusut partiit saamerlerpaanik taaneqartartut amerlanerussuteqalissagaluarpata, Nunatsinnut ajornartorsiortitsilersinnaaneri, tamannali ersissutigineqartariaqanngitsoq, Naalakkersuisut siulittaasuata oqaatigaa.

- Nunatta nukittoqutigaa EU-mi aallartitaqarnerput. Tassanilu sulisut EU-mi politikerinut sinniiniarnernik suliaqartarput ilaatigullu politikerit isummiussaannik allanngortitsiniarnermik aqqutissiueqataasarlutik. Taamaattumik apeqqutaavallaanngilaq partiit qiningaasussat sumut samminersut eqqarsaatigissallugu. Naalakkersuisut siulittaasuat, Aleqa Hammond taama naggasiivoq.

Europami nunat EU-mut ilaasortaasut maanna 28-upput sulilu taakku ilaartornissaat mattunneqavinnani.