- Nunarsuarmioqatigiit nunatsinnut ukkatarinninneranni danskit nunatsinnut qujanarniarnerat aatsaat taama annertutigisoq, Aleqa Hammond isumaqarpoq.Assi: KNR

Aleqa erfalasoq pillugu oqallinnermut: Danskit qujanarniarput

Sirius Patruljen siunissami alapernaarsuinerminni erfalasorput aamma danskit erfalasuat ilisarnaatigisassavaat, taama qallunaat naalakkersuisui isumaqarput. Aleqa Hammondip qujanarniarnerarpai.

Tunup avannaarsuani qimusserlutik alapernaarsuisartut, Sirius Patruljen, alapernaarsuinerminni danskit erfalasuat 1952-miilli kisiat ilisarnaatigisarpaat.

Tamannali qanittumi allanngortinneqarsinnaavoq.

Qallunaammi naalakkersuisui isumaqarput alapernaarsuisut qamutaanni danskit erfalasuata saniani aamma Erfalasorput ilisarnaatitut atorneqartassasoq.

Erfalasuttali danskit erfalasuata eqqaaniitillugu alapernaarsuisalernissamik takorluugaqarneq nalaatsornerinnaanngitsoq Inatsisartuni nunanut allanut sillimaniarnermullu ataatsimiitsitaliami siulittaasoq isumaqarpoq.

- Piffissanngorpormi, taanna taama oqarpoq.

AAMMA ATUARUK Danskit naalakkersuisuisa Erfalasorput alapernaarsuisut Siriusikkut qamutaannut ilanngunniaraat

- Maannakkut tamanna piffissaq atuutilerfia nalaatsornerinnaanngilaq, aatsaat taama nunarsuarmioqatigiit nunatsinnut isai isigitillugit danskit nunatsinnut qujanarniarnerat aatsaat taama angitigilissasoq. Pissutigalugu siornatigullu erfalasorput ataqqillugu pisimagunikku qangarsuaaniilli tamanna pisimassagaluarpoq, Aleqa Hammond (NQ) oqarpoq.

Akerlianillu Aleqa Hammond isumaqarpoq erfalasutsinnik atuisalernissamut qallunaat naalakkersuisuisa siunnersuuteqarnerat nunatsinnut allatulaaq qujanarniarniarfiusoq.

- Danskit nunatsinnut qujanarniarnerat allatulaaq aamma massakkut sammiveqalerpoq. Kalaallit Nunaat pinngitsoorsinnaannginnamikku. Aammalu nunarsuarmioqatigiinni politikkimi angisuumik anguniagaqarnerminni nunatta inissisimaffia danskinut aatsaat taama pingaaruteqartigaaq. Issittulerngusaannermi aamma Qalasersualerngusaannermi, Aleqa Hammond oqarpoq.

IA: Qamutini erfalasutta atorneqartalernissaa isumassarsiatsialaavoq

Aleqa Hammondilli Inatsisartuni nunanut allanut sillimaniarnermullu ataatsimiitsitaliami ilaasortaaqataa allatut isumaqarpoq:

- Isumaqarpunga isumaq isumassarsiatsialaasoq. Danskit illersornissamut aamma upalungaarsimanissamut, nunallu nakkutiginissaanut suliaq ingerlakkaluaraat, taamaattorli aamma nunatsinniimmata, nunarpullu nakkutigineqarmat isumaqarpunga isuma taanna pitsaasuusoq, Mimi Karlsen (IA) oqarpoq.

Danskit illersornissamut ministeriata, Trine Bramsenip, DR-imut ataasinngornermi nassuiaanera naapertorlugu erfalasutsinnik atuisalernissaq sillimaniarnermut toqqissimatitsinermullu suliaqarneq kalaallit peqatigalugit ingerlanneqarneranut takutissutissaasussaavoq.

Erfalasoq akuulerulernissatsinnut alloriaataavoq.

-  Isumannaassuseq toqqissisimanerlu pillugit kalaallinik suleqateqarnitta erseqqissumik takutinnissaa uani pineqarnerpaajuvoq. Suleqatigiippugut ataatsimoorussamillu akisussaassuseqarluta, Bramsen DR-imut oqarpoq.

Tamannalu nunatsinni alapernaarsuisarnermi kalaallinik amerlanerusunik peqataatitsisoqartarnissaanut nutaamik kissaateqalersitsivoq.

- Tassa una erfalasoq soorunami alloriaataavoq akuunerunissatsinnut. Kisiannili suli annertunerujussuarmik nunatsinni, ingammik inuusuttortatta nunatsinnut nakkutilliinerannut, atorneqassasoq aamma ilassutigineqassasoq isumaqarpunga, Mimi Karlsen (IA) oqarpoq.

Aleqa Hammondillu isumaqatigaa:

- Isumaqarpunga taamannak oqarnera timitalerneqassasoq. Tassalu Siriusimi qimusserluni nunatta sineriassuani angalasarneranni kalaalerpassuarnik peqalernissaa takorusuppara, Aleqa Hammond oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat