Aleqa: Atassutikkormiullu avissaarnerput nukittorsaatigissavarput

Naalakkersuisooqatigiinnut Atassutip saannera, Siumumik suleqateqarusukkunnaarnermik pissuteqanngitsoq, Siumup siulittaasuata Aleqa Hammondip oqaatigaa. Partiit suleqatigiinnerat ajorsimanngitsoq aamma oqaatigalugu:

Atassutip partiitut nammineq pisinnaatitaaffitsik malillugu aalajangernerat ataqqivarput. Ataatsimiititalianut pingaaruteqartunut Siumup Atassummut tunniussiumannginnera suleqatigiikkunnaarnermut pissutaanerugunartoq, Aleqa Hammondip nalilerpaa:

- Aningaasaqarnermut ataatsimiititaliami issiasoqannginnertik pissutigalugu suut sammineqarnersut nalileruminaatsittarpaat, taamaattumiguna suleqatigiikkunnaarneq kissaatigisimagaat, Aleqa Hammond KNR-imut oqarpoq.

Illuatungiliuttutut kisimiilernertik Aleqa Hammondip ersissutiginngilaa.

- Aningaasaqarnermut ataatsimiititaliami issiavinni tallimaasuni marluk Siumukkormiunit inuttaqalernissaat nukittuallaatigiinnartussaassavagut, Aleqa Hammond oqarpoq.

Suleqatigiikkunnaarnerup kingorna Atassutip nukittuallannissaa Aleqa Hammondip apeqquserpaa:

- Atassutip sanngeequtigilersussaavaa Naalakkersuisooqatigiinnut isumaqataallutik taasisalertussaanertik, Aleqa Hammond oqarpoq.

Illuatungiliuttutut suleqatigiikkunnaarnissaq ullormik ataatsimik sioqqullugu Siumukkormiut paasivaat Atassutikkormiut akuerseqataanissaminnik taasilersaartut, taamaattumik tamanna tupaallaatigineqarsimanngilaq. Tamannalu tunngaviginerugunarlugu Siumup avissaarneq ajorinnginnerarpaa.

Aleqa Hammond aperaarput Atassutip qujasuinneranik avissaarneq pisimanersoq, akivorlu:

- Taama taaneqarsinnaanngilaq. Politikkikkut sulineq taamaappoq, tassami angusassaq sunniuteqarnissarlu politikkikkut anguniarneqartarpoq, tamannalu pissutigalugu Atassut tassa suleqatigiunnaarparput, Aleqa Hammond taama naggasiivoq.