Aleqa: Apeqqutit akineqanngitsut amerlavallaarput
Paasissutissammi tusagassiorfinnit tusarneqareermata.
- Aammali koruunit miliardit affaanit aningaasaliinissamut piginnaatitsissagutta suliassamut tunngaasut tamaasa qulaarneqartariaqarput, Aleqa Hammond oqarpoq.
Aleqa Hammondip erseqissarpaa, Royal Greenlandip siulinnissaata pitsaasuunissaanut Siumumiit peqaataffigerusukkamikku. Sulifissat tunitsivissaqarnerlu attattuarnissaat taamaalillutik tulakkerusukkitsik oqaatigaa.
- Kisianni aningaasarpassuit pineqarput. Taamaammat Naalakkersuisut Aningaasaqarnermut Ataatsimititaliamut qinnuteqaateqarnissaannut piginnaatitsissummik qinnuteqartinnagit, saqqummiussat ikappallaartut, apeqquterpassuarnillu pilersitsisut, minnerpaamik Inatsisartunut tamanut akissuteqarfigineqartariaqarpoq, Siumup siulittaasua oqarpoq.
Nunarsuarmi aningaasarsiornikkut ajornartoornermi Royal Greenland qanoq tulluarsarnersoq taassuma ujartorpaa, oqarluni nassuiaammi, Inatrsiartunut tunniunneqartumi ersinngitsoq.
- Aningaasarsiornerup ajalusoorsimanera imaaliallaannaq aaqqinnavianngitsoq nalunngilarput. Taamaattumillu apeqqutigisariaqartoq pingaaruteqartoq tassaavoq; aappaagu taamaattunik aamma qinnuteqartoqaqqissava? Imaluunniit aaqqiniutissaq suna Royal Greenlandip piareersaatigaa? Uani eqqarsaatigaakka, sulisoqarnermut tunngasut, niuernermut tunngasut aammalu pigisat nalillit qanoq inissisimappat?
Taamaattumi aningaasat taama amerlatigisut pineqartilugit akissussaassuseqartumillu Inatsisartuni sulissagutta, paaserusutavut iternga tikillugu paasissariaqarpagut, Aleqa Hammond oqarpoq.
Royal Greenland-imut aningaasaliinissamut apeqqut Inatsisartut tallimanngorpat matoqqasumik oqaluuserissavaat.