Aleqa: Aalisartut MSC-mut piareersimanngillat
Kalaallit Nunaata imartaaneersut raajat MSC-imik meqqilerneqartalernissaat, Royal Greenlandimit Naalakkersuisunit, aalisartut piniartullu kattuffiannit KNAPK-mit peqatigiiffinniillu allanit pingaartinneqaraluaqisoq, Siumup siulittaasuannit Aleqa Hammondimit oqallisigineqaqqaartariaqartoq oqaatigineqarpoq.
- Isumaqarama aalisarnermut inuussutissarsiuteqartut ajornartorsioreertut qaavatigut ajornartorsiutissaanik allanik artukkeqqinneqarsinnaanngitsut, taamaattumik MSC-i aalajangiiffigineqannginnerani isumaqarpunga pissusissamisoortoq susassaqartut tamarmiullutik isummersoqatigiiffigalugu qanimut ilusilersorunikku, Aleqa Hammond oqarpoq.
MSC tassaavoq, aalisakkanik nungusaataanngitsumik piujuartitsinermut uppernarsaataasartoq, nunamut imaluunniit suliffeqarfinnut tunniunneqartartoq.
Radioaviisimi piffissami kingullermi MSC pillugu ilanngutassiisarsimavoq, tassanilu oqariartuutigineqarpoq soorlu KNAPK-miit qanoq MSC meqqi pingaaruteqarluinnartoq. KNAPK-mit oqaatigineqarpoq, nunarsuarmioqativut MSC-inik meqqitalinnik pisiumanerulersimasut, apeqqutaatinnagu MSC meqqitallit akisunerunersut.
MSC-imik nunatta raajaat meqqilerneqarsinnaanissaat akuerineqassanersoq, qaammatip tulliani tassa januaari 2011-imi naliliiffigineqassaaq. Tamannalu Aleqa Hammondimit, apeqquserneqarpoq.
- Uanga isumaqarpunga aalisartut namminerisaminnik oqariartuutaat soorlu, avataasiortut sinerissallu qanittuani aalisartut nipaat isumaallu tusarfigineqartariaqartut, Aleqa Hammond oqarpoq.
