Aleqa: Aajap talerperliit ikiuinnarpai
Ukiuni kingullerni 20-ni ataatsimiititaliami kalaallit siulittaasutut toqqarneqartartut maanna tassa danskimik Venstreneersumik, Marcus Knuthimit ataatsimiititaliaq siulittaasoqalissaaq.
Tamannalu Aaja Chemnitz Larsenip uggoraa.
- Kalaallit Nunaannut tunngasunut pissutsinullu ilisimasaqarpianngitsumik ataatsimiititaliap qallunaamik siulittaasoqalernera assut uggornarpoq, Aaja Chemnitz Larsen KNR-imut oqarpoq, Folketingimilu saamerliit sumiginnaanerarlugit oqarluni.
- Kalaallimik inuttalerneqarnissaa pillugu saamerliit, Socialdemokraatinit siuttuuffigineqartup, tamanna sorsuuteqaratilluunniit siulittaasuuffik allamut tunniuppaat. Taamaallaallu siulittaasup tulliatut, namminneq suleqatiminnik kalaallimik inuttalerneqarnissaa ajorinagu, Aaja Chemnitz Larsen oqarpoq.
Folketingimi ataatsimiititaliat inuttalersorneqarnerisa ingerlanneqarnerat tunngavissaqanngitsumik kukkusumillu, Aaja Chemnitz Larsenip arlaleriarluni maanna isornartorsiortaraa tusaallugu tujorminarpoq, Aleqa Hammond tusagassiuutinut nalunaarummini allappoq.
- Ataatsimiititaliap Venstrenut tunniunneqarnera Socialdemokraatit isumaqatigiinniarnerannit tunngaveqanngilaq, soorlu Aaja Chemnitz Larsen taama paasineqarsinnaasumik tunngavilersuigaluartoq. Ataatsimiititaliami siulittaasuuffik talerperlernut tunniunneqarnera ataasiinnarmik tunngaveqarpoq, tassalu Danmarkimi talerperliit ajugaanerannik taamaallaat tamanna tunngaveqarluni, Aleqa Hammond allappoq imalu nangilluni.
- Ataatsimiititaliami siulittaasuuffik Venstremut ilaasortamut tunniunneqarnera, Aaja Chemnitz Larsenimit Socialdemokraatit pisuutinneqarput, taamalu pisuutitsineq talerperlernik nunannaarutaaginnarsinnaavoq, Aleqa Hammond naqissusiivoq.
Taassuma ilanngullugu aamma naqissuserpaa, Folketingimut qinersinermi Nunatsinni partiinit qiningaanerpaamit, ataatsimiititaliaq inuttalerneqarneq ajormat, tamannali pisarmat Folketingimi partiit isumaqatigiinniarnerisigut, Aleqa Hammond naggasiivoq.
