Aleksander Lukasjenko innuttaasunit iluarineqanngeqaaq

Akerliussutsiminnik takutitsisut 5000-init amerlanerusut Minsk-imi ingerlaaqatigiissimapput.
Allattoq Mads Lynge
oktobarip 14-at 2007 17:29

Hvideruslandip præsidentia Aleksander Lukasjenko innuttaasunit iluarineqanngeqaaq.

Lukasjenko-p aqutsineranut akerliuniarlutik akerliussutsiminnik takutitsisut tuusintilikkaat ullumi katersuussimapput, Hvideruslandip illoqarfiisa pingaarnersaanni Minsk-imi akerliussutsimik takutitsisoqarami.

Nunat Killiit inatsisaasa malinneqarnissaat kisermaassillunilu aqutsisoqannginnissaa inuit 5000-iusut piumasaqaatigaat. Illuatungiliuttunut siuttoq Alexander Milinkevitj akerliussutsimik takutitsinermi oqalugiartuni pingaarnersaajuvoq.

Præsidenti Aleksander Lukasjenko USA-mit aamma iluarineqanngeqaaq, ilami Lukasjenko kisermaassilluni aqutsisut kingullersaattut USA-mit suaarutigineqareerami.

Lukasjenko 1994-imiilli Hvideruslandimi præsidentiuvoq, nunallu naalakkersugaaneranik isornartorsiuisut sukannersumik iliuuseqarfigisarsimallugit, tusagassiuutillu attaviitsut matutissimallugit.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq