Alcoap tapersersortai ilapput

Aluminiumik Maniitsumi aatsitsiviliortoqarnissaanut isumaqataasut peqatigiiffimmik pilersitsipput.
februaarip 11-at 2011 11:27

Peqatigiiffik taaguuserneqartoq "Aatsitsivik soqutigaarput" ippassaani pilersinneqarpoq, siulittaasullu neriuutigaa Maniitsumi aatsitsiviliornikkut illoqarfik aningaasarsiornikkut ineriartoqqilissasoq.

Aluminiumik Maanitsumi aatsitsiviliortoqassanersoq, Inatsisartunit suli aalajangerneqanngilaq.

Aatsitassarsiornermut Naalakkersuisup Ove Karl Berthelsenip Inatsisartut ukiarmi ataatsimiinneranni aatsitsiviliornerup avatangiisinut sunniutissai pillugit nassuiaateqarnermini ilaatigut oqaatigaa aatsitsiviliornissamut periarfissat suli 50 procentiinnaasut.

Aningaasarsiornikkut ineriartornissaq illuanilu kulturikkut kingornussat tammatsaalinissaat oqimaalutarneqartussaasut oqaatigai.

Aluminiumik aatsitsitsiviliorsinnaanermut apeqqut Maniitsumi sammineqaqaaq. Akerliusut Januaarip qeqqani peqatigiiffiliorput taaguuteqartumik "Against Aluminum Smelter in Greenland". Peqatigiiffiup ilaatigut avatangiisit kulturikkullu kingornussat illersorneqarnissaat sulissutigaa.

Maannalu aamma illersuisut peqatigiiffittaarput taaguutilik "Aatsitsivik soqutigaarput".

Maniitsumi aatsitsiviliortoqassagaluarpat inuussutissarsiornikkut pitsaaqutissat arlaqartut siulittaasoq Aqqalu Skiftep isumaqarpoq.

- Maniitsumi ineriartortoqaqqilissaaq, sunngiffimmi sammisassaqarnerulissaaq, suliffissat amerlanerulissapput, aningaasaqarniarneq qaffakkiartulissaaq.

Aammattaaq Maniitsormiut, illoqarfinnut allanut nuussimagaluartut, uteraqqilissasut peqatigiiffimmit ilimagineqarpoq.

- Ukiuni kingullerni suliffeqarfiit assigiinngitsut Polaroliakkut KNI-p qullersaqarfia suliffeqarfiillu allat, Maniitsumiit nuunneqarnikuupput, taamaasilluni ajoraluartumik innuttaasut ikiliartornerannik kinguneqarluni.

Peqatigiiffik "Aatitsivik soqutigaarput" innuttaasunit soqutigineqarpa?

- Assut soqutigineqaqaaq. Kalaallit Nunaat namminiilernikuuvoq, taamaasilluni aamma nunarput nammineerluni pilliuteqartariaqarpoq, Aqqalu Skifte oqarpoq.