Alcoap piumasai ataatsimiititaliaagallartumi oqallisigeqquai

Alcoap utaqqikatalluni Naalakkersuisunut nukingisaarinera ataatsimiigiaqqusinermut tunuliaqutaasoq, Karl Lyberthip oqaatigaa:

- Naalakkersuisuninngaanniit paasitinneqarpugut Alcoa suliamut uunga tunngatillugu utaqqikatattoq, aatsitsiviullu pilersinneqarnissaata tungaanut aningaasartuutissat Alcoap amerlavallaarnerarai. Naalakkersuisuniit taama saqqummiisoqarmat Inatsisartuni ataatsimiititaliami tassuunga attuumassuteqartut piaarnerpaamik ataatsimiittariaqartut piumasaraara, Karl Lyberth oqarpoq.

Aatsitsiviliornissamut atatillugu nunanit allaneersunik sulisoqarnissamut tunngatillugu Sulisitsisut Peqatigiiffiannik SIK-millu isumaqatigiinniarnerit Alcoap naammaginngilai, aatsitsiviliorniarnermullu aalajangiinissaq tuavisaarutigalugu.

Inuussutissarsiornermut Aatsitassanullu Naalakkersuisup Ove Karl Berthelsenip ataatsimiititaliamit isumasioqatigineqarnissaa, Karl Lyberthip anguniarpaa, naalakkersuisumullu piumasarineqartut ima nassuiarlugit:

- Paasissutissat assigiinngitsut Alcoamit saqqummiunneqartut suunersut erseqqissumik paaserusussavavut, paasissutissat suuneri pingaaruteqarmat. Aluminiumik aatsitsiviliorniarneq pillugu Naalakkersuisut qanorpiaq pilersaaruteqarnersut paaserusussavarput. Qaqugu, sunillu saqqummiussiniarnersut paaserusussallutigu, Siumut sinnerlugu Inatsisartunut ilaasortaq Karl Lyberth oqarpoq.

Aluminiumik aatsitsiviliortoqarsinnaanera pillugu ataatsimiititaliaagallartup siulittaasua Justus Hansen oqarpoq piaarnerpaamik ataatsimiittoqarumaartoq, qaqugorpiarli tamanna pisinnaanersoq oqaatigisinnaanngikkallarnerarlugu.