Alcoap ileqqorissaarnissaa naalakkersuisut piumasaqaatigissavaat

- Suleqatiginissaannut nalilersuinerit sakkortusisariaqarput. Migutitsinernut piumasaqaatit sakkortunerunissaannut maanna tunngavissaqqalerpugut, Ove Karl Berthelsen oqarpoq.

Nunani allani, ilaatigut Hondurasimi, Alcoap aatsitsivissuani sulisut inuttut pisinnaatitaaffiisa unioqqutinneqartarsimaneri, nalunaarusiami The National Labor Committeemit 2007-mili allaaserineqarsimasumi, atuarneqarsinnaapput.

- Sulisunik naqisimanninneq, inuit pisinnaatitaaffiinik unioqqutitsinerit, sulisut akissarsialunneri, sulisut najugaqarfiinik suusupaginninnerit aamma sulisunik kattuffinni ilaasortaasunik malersuinerit nalunaarusiami saqqummiunneqarput.

Inuussutissarsiornermut Naalakkersuisup Ove Karl Berthelsenip oqaatigaa nalunaarusiap avammut tusartinnissaa maanna tunngavissaqarluartoq.

- Suliffeqarfissuaq ileqqorissaassaguni, neriuppunga takusinnaassagaa nalunaarusiap maani inuiaqatigiinnut saqqummiunneqarnissaa pisariaqartoq. Pinngitsoorani Alcoamut aamma pigaaruteqassaaq maani innuttaasut Alcoamut isiginninnerat qanoq innersoq, naalakkersuisoq oqarpoq.

Suliffeqarfissuup Alcoap inuit pisinnaatitaaffii unioqqutillugit pilissappat, Naalakkersuisoq qanoq iliulersaarpa?

- Inuiaqatigiit sinnerlugit uagut oqartussaavugut. Amma isumaqatigiinniarnerni assigiinngitsuni inissiinissarput pisariaqassaaq. Ove Karl Berthelsen oqarpoq.

Suleqatigiinnerup nalilersornissaa saqqummiunneqartassava qanorluunniit akisutigigaluarpat?

- Soorunalimi nalilerneqarpat inuiaqatigiinnut avatangiisinullu kingunerlutitsisumik pisoqartoq, taava qanorluunniit inuiaqatigiinnut akisutigigaluarpat suleqatigiinneq nqalilersoqqinneqartariaqassaaq, Ove Karl Berthelsen oqarpoq.