Alcoamut attaveqartartut sulerisarpat?
Amerikami suliffeqarfimmut Alcoamut immikkut ittumik nunatsinniit attaviginnittartunik ilisimaneqarpianngitsumik inunnik marlunnik naalakkersuisut soraarsitsinerat tusagassiorfinni sammineqaleriataarpoq – ilaatigullu tamanna inatsisartuni illuatungiliuttut apeqquteqaatigaat.
Namminersornerullutilli Oqartussat amerikamiullu alumiiniliorfiata Alcoap akornanni attaveqaqatigiinnermut ataatsimiititaliaani sulerisoqartarpa?
Naatsumik oqaatigalugu isumaqatigiissutit tamarmik eqquutsinneqarnersut nakkutigisassaraat. Kangerlussuup kujataani Tasersiap eqqaani alumiiniumik aatsitsiviliortoqarsinnaaneranik tassungalu atatillugu erngup nukinganik nukissiorfiliortoqarsinnaaneranik misissuinissamut Alcoa akuerineqarmat, suliffeqarfik naalakkersuisullu arlalitsigut imminnut pisussaaffilerput. Tassalu pisussaaffiit tamakkua malinneqarnersut ataatsimiititaliap oqaluuserisarpai.
Ataatsimiititaliaq arfineq-pingasunik ilaasortaqarpoq – sisamat Alcoa-meersuupput – allallu sisamat naalakkersuisunit toqqagaallutik. Stig Rømer Winther aamma Niels Wilhjelm taarserlugit, ilaasortanngortut nutaat marluk Svend Hardenbergip Nukissiorfinneersup aamma Peter Schultzip naalakkersuisut allaffeqarfianneersup, saniatigut naalakkersuisut sinnerlugit ilaasortaapput Peter Hansen inuutissarsiornermut naalakkersuisoqarfiup pisortaa aamma Alfred Jakobsen avatangiisit pillugit naalakkersuisoqarfimmi pisortaq.
Ataatsimiititaliaq ukiumut sisamariarluni atatsimiittarpoq, suullu tamarmik pissusissamittut ingerlanersut qulakkeerneqartarlutik. Ataatsimiititaliaq aalajangiisinnaatitaanngilaq. Ataatsimiititaliap ilaasortaasa nunatsinneersut paasisatik naalakkersuisunut ingerlateqqittussaavaat. Naalakkersuisullu tassaapput misissueqqissaarnissamut atatillugu allannguisoqassappat aalajangiisussat.
Naalakkersuinermik suliaqartunut attaveqarneq inuutissarsiornermut pisortaqarfik aqqutigalugu pisarpoq. Tassani pisortaq Peter Hansen – taaneqareersutut ataatsimiititaliami ilaasortaasoq - naalakkersuisut soraarsitsineri pillugit oqaaseqarusunngilaq, oqaatigaluguli maanna siumut isiginissaq sulinerullu ingerlaqqinnissaa pingaarnerusoq.
Ataatsimiititaliaq ualimut ataatsimeeqqittussaavoq – inuutissarsiornermullu naalakkersuisoqarfimmi pisortap Peter Hansenip ataatsimeereerunik suliap killiffia pillugu oqaaseqarsinnaanissani naatsorsuutigaa.
