Alcoamit isertitat kommuninut equngasumik tussapput
44 millioni koruuniniit 87 millioninut. Maniitsup eqqaani Aluminiuliorfiliortoqassappat, aningaasat taama amerlatigisut kommunit karsiinut pisariaqartitiseqisunut tussinnaapput.
Kisianni massakkut pissutsit atuutiinnassappata, millionerpassuit equngasumik agguaanneqassapput: Kommune Kujalleq aamma Qaasuitsup Kommunia annaasaqassapput, aluminiuliorfissaq kajungerisutut sulisussanik taakkunanngaanneersunik nutsuissammat. Sulisullu kommuninut nuuffigisaminnut akileraassapput.
Tassalu Qeqqata Kommunia isertitaqarnerulissaaq, kommunillu akornanni nalimmassaanermut aaqqiisuussineq allanngunngippat, aamma Kommuneqarfik Sermersuup kommuninut allanut akiliutigisartagai minnerulersinnaapput.
Alumiuniuliorfissamik pilersaarutip kommunit aningaasaqarnerannut sunniutissaannik naliliinerup tamanna takutippaa. Naliliineq Greenland Developmentip Copenhagen Economicsimut suliakkiutigaa.
Christian Jervelund naliliinermik suliaqartunut ilaavoq. Qanoq iliortoqanngippat kingunissat ima nassuiarpai:
- Sulisartut pikkorissut Kommune Kujallermiit aamma Qaasuitsup Kommunianiit Qeqqata Kommunianut nutserpata, kommunini aallararfiusuni ineriartorneq unissaaq, aamma sulisussat akileraarutitigullu isertitat amingaataalissapput. Taamaammat sulisinnaasut amerlisarniarlugit assorsuaq sulisoqartariaqassaaq. Tassa sulisimanngikkaluartut sulilersillugit piffissallu ilaannaani sulisarsimagaluartut aalaakkaanerusumik sulilersillugit, Christian Jervelund oqarpoq.
Taassuma aamma tikkuarpaa, kommunit akornanni isertitat nalimmassarniarlugit periutsit aamma misissorneqartariaqartut.
Aluminiuliorfiliortoqarpat Nunap tamarmi isertitassaasa, matumani Qeqqata Kommuniata annerusumik iluanaarutigisassaasa nalimmassaanermut aaqqissuussinikkut naapertuunerusumik agguataarneqarsinnaappat?
- Tamanna politikerit akissutissaqartinniartariaqarpaat, Christian Jervelund oqarpoq.
Naliliinermi takutinneqarpoq, ullumikkut pissutsit tunngaviussappata Kommune Kujalleq 2 mio. koruuniniit 11 mio. koruunit tikillugit annaasaqarsinnaasoq. Qaasuitsup Kommunia 4 mio. koruuniniiit 19 mio. tikillugit annaasaqariaannaavoq. Kommuneqarfik Sermersooq 2 mio. koruuniniit 13 mio. koruunit tikillugit iluanaarsinnaavoq, Qeqqatalu Kommunia 71 mio. koruuniniit 80 mio. koruunit tikillugit iluanaaruteqarsinnaalluni.
Greenland Developmentip naatsorsuutigaa, naliliinermit inernerit Inatsisartut ukiakkut ataatsimiinnissaanni saqqummiunneqassasut.
Pisortaq Flemming Drechsel ima oqarpoq:
- Paasissutissat saqqummiussagut tunngavigalugit qanoq ingerlariaqqittoqassanersoq, Naalakkersuisut Inatsisartullu aalajangersinnaassaalissavaat., Flemming Drechsel oqarpoq.
