Alcoa ullumi oqaluuserineqassaaq

Aluminiumik aatsitsiviliornissamut suliniummut nassuiaat Inatsisartuni ullumi oqaluuserisassanut kingulliullugu saqqummiunneqassaaq.
novembarip 10-at 2010 06:31

Nassuiaat Aatsitassanut Naalakkersuisumit Ove Karl Berthelsenimit saqqummiunneqassaaq.

Maniitsumi aluminiummimik aatsitsiviliornissamik Alcoap pilersaarutaa, ukiut sisamat matuma siorna aallartippoq.

Pinngortitamik, avatangiisinik, kulturikkut oqaluttuarisaanikkullu eriagisassanik, peqqissutsimut tunngasunik aamma nunap immikkoortuani ineriartorneq eqqarsaatigalugit Avatangiisinik Nalilersuisoqarsimanera pissutigalugu, suliniut ukioq kingulleq tamangajaat ingerlateqqinneqarsimanngilaq.

Aatsitsivissamik pilersaarut taamatut isikkoqartillugu akuerineqarsinnaanngitsoq, Nunatta Katersugaasiviata Atuagaateqarfiatalu nalilerpaa. Taamatut naliliinermut pissutigitinneqarpoq, Tasersiaq toqqarneqarsimammat erngup nukinga atorlugu innaallagissiorfittut atugassanngorlugu.

Tatsip Tasersiap eqqaa, oqaluttuarisaanitsinnut kulturikkullu eriagisassanik peqarnera, Nunatta Katersugaasiviata nalilersimavaa, taamaattumillu Tasersiap innaallagissiorfissamut atorneqannginnissaa innersuussutigalugu.

Suliniummut nalunaarusiami allassimavoq, 2008-mi 2009-milu paasiniaanerit suliarineqartut inernerisa paasinarsitikkaat Maniitsumi aatsitsiviliornissamut toqqammavissat pitsaasuusut.

Aamma aatsitsivik pilersinneqarpat Maniitsumut inuit suliniarlutik nuuttut ikinnerpaamik 800-t missaaniissangatinneqarput, ilaquttatik ilagalugit nuukkunik 1200-t missaanniissallutik.

Inuit nuttarnerannik paasiniaasut aamma paasinarsitippaat, suliassarsiorlutik nuukkusuttartut nunatsinni amerlasuujusut.

Suliniutip nassuiaataani atuarneqarsinnaavortaaq, aatsitsivik iluatsissappat tamanna nunatta aningaasarsiorneranut iluaqutaassasoq, minnerunngitsumik sulisut akileraarutaatigut.