Alcoa pillugu tusarniaanerit paasissutissiinerillu amigarai

Assersuutigalugu pilersaarut taamaattoq Canadami minnerpaamik ukiuni tallimani piareersarneqartarpoq, suliffissuaqarnerup sunniutissai paasisitsiniutigineqaqqaartarmata inuillu tusarniarneqaqqaartarlutik. Inuit inuiaqatigiillu pissusiinik misissuisoq, Mark Nutall taama oqarpoq.

Mark Nutall, ulluni makkunani Namminersulernissatsinnut persuarsioqataajartorluni Nuummiittoq oqarpoq, Maniitsumi pilersinniakkap assinganik Alcoa Akilinermi sananiartuuppat, minnerpaamik ukiuni tallimani paasissutisanik katersinerit tusarniaanerillu ingerlanneqaqqaassagaluartut. Suliffissuaatillit pilersaaruteqaleraangata Mark Nutall Akilinermi inuiaqatigiit pisinnaatitaaffii pillugit suleqataasarsimavoq. Tasamanilu taamatut pilersaaruteqartut assigiinngitsorpassuartigut piumaffigineqartarput. Avatangiisinut inuiaqatigiillu ingerlanneqarnerannut suliariniakkat sunniuteqarnissaat ilisimatuussutsikkut sukumiisumik misissorneqartarput paasissutissiissutigineqarlutillu. Taamatut misissuinerit paasisitsiniaanerillu ukiuni marlunni pingasuniluunniit ingerlanneqartariaqartarput. Tamakkualu qaangiukkaangata inuiaqatigiinnut oqallisissanngortinneqartarpoq, inuit isumakuluutaat tunngavissaqarnersut paasiniarneqaqqaartarlutik. Inuit tusarniarneqarnerisa aallartinneranni immikkut arlaannaannulluunniit attuumassuteqarluni pituttorsimanngitsumik pisortat allaffeqarfiliortarput. Taava ilisimatuussutsikkut paasisat, kiisalu teknikkikkut aningaasaqarnikkullu sunniutaasinnaasut tassani allaffeqarfimmi katersorneqartarput. Inuit, kattuffiit allalluunniit suliariniakkamit arlaatigut kalluarneqartussat allaffeqarfimmiit tusarniarneqartarput paasiniaaffigineqarlutillu. Kiisalu suliariniakkap toqqaannanngikkaluamik sunniuteqarfigisinnaasai ilanngullugit nalilersorneqartarlutik.

Akilinermi taamatut pilersaaruteqartoqartillugu, sulliffissuaatillit inatsisitigut sukannersumik piumaffigineqartarput, Mark Nutall oqarpoq.

Mark Nutallip ilisimatuutut Nunatsinni sulilluni najugaqarsimasup oqaatigaa, piffissaq taama sivikitsigisoq atorlugu, suliffissuaatillit pilersaarutaannut akuersiniapallanneq, paasissutissat amigartut tunngavigalugit naliliiffigineqarnissaa aarleqqutigineqarsinnaasoq. Paasisitsinianerit tusarniaanerillu amigarpata, suliffissuit avatangiisinut inunnillu isumaginninerup tungaatigut sunniutigisinnaasaat eqqumaffigineqanngitsoorsinnaapput.