Alcoa pillugu tunngaviusumik aalajangiisoqarpoq
Periarfissat taakku marluk pillugit Siumut politikkikkut oqaaseqartartua Lars-Emil Johansen ima nassuiaateqarpoq:
- Siulleq eqqaassagutsigu aningaasarpassuarnik inuiaqatigiinnut naleqarsinnaavoq. Suliassaq taanna tamarmi katilluni 25 milliardi koruunit angullugit aningaasaliissuteqarnissamut ukiuni tulliuttuni amerlasuuni pisariaqartitsivoq. 25 milliardi koruunit tassaapput Kalaallit Nunaat tamarmi ukioq kaajallallugu tunisassiaasa, BNP-ata marloriaataa. Taassumalu affaannaanulluunniit nunarput aningaasaleeqataassaguni 10 milliardi koruunit angullugit nammatassinneqartussaavoq, sanaartugassanullu nukissaaruteratarsinnaalluta. Taamaattumik imaaliinnarluta oqarsinnaanngilagut: Aatsitsiviliorfissap 50 procentia Kalaallit Nunaata pigissavaa. Kisianni misissussavarput, Lars-Emil Johansen oqarpoq, periarfissallu aappaa nassuiarlugu:
- Misissugassatut aamma tikkuarparput Kalaallit Nunaat annerusumik aningaasaleeqataanngikkaluarluni akuersissuteqarnikkut aningaasanik isaatitsisinnaasoq, suliffissanillu pissarsisitsisinnaasoq. Taanna danskisut koncessionmodelimik taaneqartarpoq, periarfissallu taakku marluk 2009-p aallartilaarnerani aalajangiivigineqassasut naatsorsuutigaara, Alcoamillu isumaqatigiinniarnerit inaarutaasumik ingerlateqqinneqassanersut Inatsisartut aalajangerumaarpaat, Lars-Emil Johansen oqarpoq.
Tunngaviusumik aalajangiinerup saniatigut, aatsitsiviliornissamut misissuinissamut atugassat 76 millioni koruunit Inatsisartunit aningaasaliissutigineqarput.