Alcoa pillugu nalunaarusiaq naalakkersuisunit ilisimaneqarsimanngilaq
Maanna Inuussutissarsiutinut Naalakkersuisup, Ove Karl Berthelsenip, nalunaarusiaq taanna, aatsaat ulluni makkunani nutaarsiassaqartitsivitsigut tusarpaa.
- Tusagassiutit aqqutigalugit nalunaarusiamik taassuminnga paasisaqarpunga aammalu tusakkakka aallaavigalugit paasiniaavunga. Oqaatigisinnaavara, toqqaannartumik nalunaarusiamik taassuminnga takutinneqarnikuunngilanga.
Inuussutissarsiornermut Naalakkersuisoq, Ove Karl Berthelsen taama oqarpoq aamma taamatorluinnaq oqarpoq, 2007-mi Inuussutissarsiornermut Naalakkersuisoq Siverth K. Heilmann, nalunaarusiap saqqummernerata nalaani Naalakkersuisuusoq.
- Eqqaamasara naapertorlugu nalunaarusiamik taassuminnga takusaqarnikuunngilanga. Kisianni oqaatigisinnaavara nalunaarusiamik taamaattumik takusaqarsimagaluaruma qisuariarsimassagaluarpunga. Kisianni oqaatigisariaqarpoq, taamani Alcoamik suliffeqarfissuit nunani allani tikeraakkakka paasiniaavigigakkit, paasivara nunani taakkunani Alcoa nuannarineqartupilussuusoq.
Siverth K. Heilmann oqarpoq.
Paasinarsivoq Naalakkersuinikkut oqartussat Greenland Developmentimit Alcoa pillugu nalunaarusiamik tusartinneqarsimanngitsut. Inuussutissarsiornermut Naalakkersuisoq Ove Karl Berthelsen aperaara, suleqatissanik ujarlernermi, aammalu suleqatiginiagaq pillugu nalunaarusiortoqarsimappat, nalunaarusianik atorfilittanit nalunaarfigineqarnissaq qanoq pigaaruteqartiginersoq?
- Isummertariaasera aallaavigalugu, suleqatissarsiornermi pigaaruteqarpoq, suleqatiginiakkap pissusilersuutigisartagaat qulaajagassallu allat, uannut imaluunniit Naalakkersusiumut apuuneqarsimanissaat naatsorsuutigilluinnaqquissaarakku.
Hondurasimi pissutsinik Alcoap aaqqiinera pissutigalugu, Naalakkersuisunut nalunaarutigisimanagu Greenland Developmentimit oqaatigineqarpoq.
- Tassungarpiaq tunngasumik taamani Naalakkersuisunut tunniussisoqanngilaq. Alcoap Norsk Hydro-llu unammisinneqarnerisa misissoqqissaarnerata inernerata nalunaarusiarineqarnera taamani Naalakkersuisunut saqqummiupparput.
Greenland Developmentimi pisortaq Flemming Drechsel taama oqarpoq.
Aamma taassuma oqaatigaa, avatangiisit pillugit apeqqutit Alcoap sukumiisumik nalilersortarai aammalu suliffeqarfissuit pitsaasut allat assigalugit avatangiisinik innarliinnginnissamik siunertaqarlutit ukiut tamaasa taannarpiaq pillugu nalunaarusiortartut.
