Alcoa pillugu Naalakkersuisut akissuteqarput
- Akissut tusaatissatut tiguarput, Demokraatit nalunaarput.
Stig Rømer Wintherip aamma Niels Wilhjelmip suleqatigiinnit alumiiniuliorfimmik Alcoa-mik suleqateqartunit soraarsitaanerat pillugu apeqquteqaataat naalakkersuisunit akineqarpoq.
Taakkua marluullutik suleqatigiinnit soraarsinneqarput, naalakkersuisut Alcoa-mik suleqateqarneq qaninnerusumik ingerlakkusummassuk, taamaattumillu Nukissiorfiit pisortaannit Svend Hardenbergimit aamma naalakkersuisut allaffeqarfianni pisortamit Peter Schultzimit taarserneqarlutik. Demokraatillu soraarsitsinermut tunngaviusut paaserusussimavaat.
Taamaattorli Demokraatit isumaqarput soraarsitsineq pisariaqarsimanngikkaluartoq. Partiip oqaaseqartitaa, Marie Fleischer isumaqarpoq suleqatigiit inuttaat amerlisiinnarneqarsimasinnaagaluartut. Ataatsimiititaliap, allanik inuttalerneqartup, eqqortumik ingerlatsisoqarnissaa qulakkeerusuppaa, alumiiniuliorfiup Kangerlussuup kujataani suliffissualiornissaq misissulerpagu.
