Alcoa pillugu isumaqatigiinniartartut isornartorsiorneqarput

Alcoap Maniitsumi alumiiniumik aatsitsiviliorniarnera pillugu Namminersorlutik Oqartussani atorfillit sisamat aalajangersimasumik isumaqatiginninniarnermi peqataatinneqartarnerat isornartoqarpoq, taamatut oqarpoq, Sulitsisut Peqatigiiffianni pisortaq Henrik Leth.
Allattoq Jaaku Lyberth
januaarip 25-at 2010 15:37

Aatsitsiviliorniarnermi aningaasatigut kingunerisassai Namminersorlutik Oqartussani qaffasissumik atorfeqartunik inuttaqarpoq, taakkualu Greenland Developmentimi siulersuisuini ilaasortaapput, tamannalu isorineqarpoq.

Namminersorlutik Oqartussani naalakkersuisoqarfinni pisortat marluk, aqutsisoqarfimmi pisortaq, pisortarlu Direktøri ataaseq tassa taakkuupput Namminersorlutik Oqartussat Alcoa pillugu isumaqatiginninniartartuini ilaatinneqartartut. Isumaqatiginniartartutut atorfilittatullu inissisimanerat Sulisitsisut Peqatigiiffianni pisortap Henrik Leth-ip isornartoqartippaa

Alcoa pillugu isumaqatiginnninniarnermi angusat innunnit taakkunannga akuerineqartussaapput, politikikkullu aalajangigassanngorlugit ingerlateqqinneqartussaallutik, tassa taannarpiaq kukkunertut isigaara, Henrik Leth oqarpoq. Taanna isumaqarpoq arlaannaannulluunniit attuumassuteqanngitsunik naliliisartunik peqannginnera eqqarsarnartoqartoq.

Greenland Developmentimi siulersersuini ilaasortat naalakersuisunit toqqagaapput, isornartorsiuinerlu Greenland Developmentimi siulersuini siulittaasup Svend Hardenbergip akerlilerpaa.

Suliap ingerlanneqarnerani avataaneersunik nalilersuisitsisarpugut, taamatullu aaqqissuussaanera ajortussaqartussaanngilaq, Svend Hardenberg oqarpoq.

Alcoamik isumaqatiginninniarsinnaanermut kalaallit Nunaat piareersimanngilaq, suliap ingerlanneqarnerani immikkut ilisimasalinnit suliarineqartariaqarpoq, Henrik Leth isumaqarpoq.

Isumaqatiginninniarnerit ingerlanneqarnerini avataaneersunit ikiorteqartariaqarpoq, suliffeqarfissuarnik annertuunik nunarsuarmi tamarmi pigineqartunik Kalaallit Nunaat isumaqatiginniarnissaminut piareersimanngilaq sanngiippallaarlunilu Henrik Leth oqarpoq, isumaqatiginniarfigisassat pikkorissuupput ilisimasaqarluarlutillu. Immikkut ilisimasalinnik nunanit tamaneersunit ikiorteqartarpugut, Svend Hardenberg Henrik Lethip isornartorsiuneranut akissuteqarluni oqarpoq. Immikkut ilisimasallit oqaloqatigisarpagut, aalajangigassallu ataasiakkaat politikkikkut aalajangigassanngorlugit ingerlateqqinneqartinnagit, immikkut ilisimasaqartut nalilersugaat tusarniarneqqaqqaartarput, Svend Hardenberg oqarpoq.

Atorfillit sisamat isumaqatiginninniarnermi peqataatinneqartut tassaapput Naalakkersuisut siulittaasuata naalakkersuisoqarfianeersoq, aningaasaqarnermut sulisoqarnermullu naalakersuisoqarfimmeersoq, kiisalu aningaasaqarnermut nunanullu allanut naalakkersuisoqarfimmeersoq ataaseq.