Alcoa pillugu innuttaasunik ataatsimiititsineq oqallisaaqqilerpoq

Maniitsup eqqaani aatsitsiviliulersaarneq pillugu innuttaasunik ataatsimiisitsinerit isornartorsiorneqaqqipput.

Aatsitsiviliulersaarnermut paasissutissat sukumiisut maanna piulereerput, taamaattorli innuttaasut periarfissaqanngillat sukumiisumik isummernissaminnut, uparuaatit ilaatigut taama nipeqarput. Taamaattumik periarfissaqarnerusariaqarpugut, Inatsisartunut ilaasortaq Jane Petersen isumaqarpoq.

Avatangiisit Pinngortitallu Illersornissaannut Peqatigiiffimmi, Avatami siulitaasoq Mikkel Myrup isornartorsiuinermini sakkortuneruvoq, taanna isumaqarpoq innuttaasut paasissutissiissutinik eqqunngitsunik oqartussaasunit saqqummiussiffigineqarsimasut:

"Innuttaasut paasisitsiniaanermut aggersarneqaramik naatsorsuutigigaluarpaat pilersaarummut paasissutissanik sukumiisunik aammalu ilumoortunik paasitinneqassallutik. Apeqquserneqarsinnaavormi suliffeqarfissuup nammineq paasiniagaannik nalunaarusiat saqqummiunneqarmata."

Pilersaarummut aalajangiinissat Inatsisartut siunnerfigereerpaat. Upernaamut ataatsimiinnissami aalajangerneqassaaq piginneqataaneq qanoq ittoq atuuttuussanersoq, ukiarulu ataatsimiilerunik tamanna aalajangivittussaassallugu. Aatsaallu tassa massakkut inuttaasut isornartorsiuineri tusarsaalerlutik. Pilersaarutip oqallisigineqarluarnissaanut piffissakippallaalerpungut, Avatangiisit Pinngortitallu Illersorneqarnerannut Peqatigiiffimmiit, Avatamit Mikkel Myrup taama isumaqarpoq:

"Taamatut isikkoqartillugu, piginneqataanermut aamma pilersaarutit aalajangiiffiginissaat siusippallaarpoq, tassami inuiaqatigiit akornanni sukumiisumik suli oqallittoqanngilaq suliffissuaq qanoq ittoq pilersinniarneqarnersoq"

Inuit Ataqatigiit sinnerlugit Inatsisartunut ilaasortaq Jane Petersen, Maniitsup eqqaani aluminiumik aatsitsiviliortoqarsinnaaneranut oqallinnermut ilannguppoq.

- Alcoa pillugu oqallinnissaq pisariaqarpoq, minnerunngitsumillu naammaginartumik paasissutissat pisariaqarput, Jane Petersen allappoq innersuussutigalugulu Kalaallit Nunaanni nuttarneq pillugu misissuinermi paasineqarmat, apersorneqartut 80 procentiisa aatsitsiviliornissamut pilersaarut ilisimaqarfigerpianngikkaat. Aamma misissuinermi erserpoq, aperineqartut 67 procentiisa Kalaallit Nunaani aatsitassarsiorneq ilisimaqarfigerpianngikkaat.

- Taamaattumik pisariaqarpoq aatsitsiviliulersaarnerup aamma aatsitassarsiornerup oqallisiginissaanut piffissaqarnissaq, aatsaat taamaaliornikkut sukumiinerusumik aalajangiisinnaanngussagatta, allappoq Inatsisartuni ilaasortaq Jane Petersen, Inuit Ataqatigiit.

Suliffissuaqarnermut Naalakkersuisup, Ove Karl Berthelsenip isornartorsiuisut eqqissisarpai, oqarluni oqallinnissamut suli piffissaqarluartoq.

"Saqqummiussaq annertungaarmat atuaqqissaarnissaannut nalilersornissaannullu piffiassaqarsimanngilagut. Kisianni nalilerneqarsimavoq, innuttaasunut pingaaruteqarmata, aallarnisaataasumik innuttaasunut paasisitsiniutitut atorneqassasut. Kingusinnerusukkut inatsisartunut saqqummiunnissa qanilliartorpat, inatsisit atuuttut aallaavigalugit innuttaasunut aamma tusarniaassutigineqarumaarpoq. Taamaalilluni susassaqartunit, suliniaqatigiinnit innuttaasunillu oqaaseqarfigineqarsinnaaneri ammaanneqarumaarmata, saqqummiussap kalaallisuunngortinnera aallaavigalugit. Tusarniaanissami kikkulluunniit oqaaseqarsinnaanerat soqutiginartorujussuuvoq. Tassami suliaq piviusunngortinneqassappat, innuttaasunut allannguissappat tamakkiisumik qulaajaaviginissaa soqutigigatsigu.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat