Alcoa Nuummiunit soqutigineqaqaaq

Pilersaarusiornermut atatillugu avatangiisinut nalilersuineq naammassineqarsimalersoq innuttaasunik ataatsimiititsinermi saqqummiunneqarpoq, tassanilu naqissuserneqarpoq pilersaarusiaq piviusunngortinneqassappat, ajortumik kinguneqarnavianngitsoq.

Inernerilli kusanaraluaqisut attaveqarnermut naalakkersuisoq Jens B. Frederiksen isumaqanngilaq, atatsimiisitsineq aluminiumik aatsitsiviliorfissamik iluarinnilersitsiniutaasoq.

- Ilisimatuussuseq tunngavingalugu sunik tamanik misissuisimapput. Misissuisimaneq naalakkersuinikkut aalajangiinissamut pitsaasumik tunngavissiivoq. Assersuutigalugu paasisat, kulturikkut eriagisassanut tunngasut, toqqortiinnangilagut. Paasisat tamaasa maani saqqummiuppagut, sukumiisumik isummersorfigisinnaaniassagatsigit, Jens B. Frederiksen oqarpoq.

Avatangiisinut sunniutissat pillugit misissuinerup inernerini kulturimit kingornutatsinnut, Tasersiap sinaani tupeqarfikunut, sunniuttussat ajornerpaagunartut, saqqummiinnermi eqqaaneqarpoq. Eriagisassat assigiinngitsut tatsip iluaniilertussat 304-put, aluminiuliorfissamut imeqarfissaq kujalleq ilanngukkaani tatsit iluaniilertussat 466-iussapput. Tamanna takkuttunit arlalinnit ernumanartineqarpoq.

Ataataimiinnermi najuuttut ilaat Lissi Olsen, isumaqarpoq, kultumit kingornussat pillugit ataatsimiinnermi saqqummiussat, aluminiumik aatsitsiviliorfissap inissinneqarfissaanik aalajangernissaq allanngortissinnaagaa.

Aamma Sara Olsvig kultumit kingornutatsinnik annaasaqaratarsinnaanitsinnut ernumavoq.

- Kultrurikkut eriagisassagut kalaallit tamatta pigaagut, piujuartittariaqarpagullu. Imaluunniit minnerpaamik piujuartissanngikkutsigit, misissorlugit nalunaarsorluarlugit taamaalulligit tammatsaaleqqaarneqartariaqarput, Sara Olsvig oqarpoq.

Innuttaasunik ataatsimiititsinerit sapaatip akunnerata tuliani nangissapput. Nuummi ataasinngorpat, Maniitsumi marlunngorpat Sisimiunilu pingasunngorpat ataatsimiititsisoqassaaq.