Nunarsuarmi aluminiuliortartut annersaata tulliat, USA-meersut Alcoa, sulisumi ilaannik nunatsinnut tikeraartitseqqammerpoq.
Aluminiumik aatsitsiviornissamik ammaasinnaanissamut periarfissat suunersut paasiniaqqammerpaat, kommunillu tikeraarneqartut tassaaput Sisimiut, Maniitsup aamma Nuup kommunii.
Aluminiumik aatsitsivissamik ammaasinnatitaassagunik suliffiit ataavartut 700-t aamma 800-t akornanniittut pilersinneqarsinnaassasut, Alcoa-p avammut attaveqartartua Wade Hughes oqarpoq, sulisullu amerlanerpaartaasa kalaaliunissaat neriorsuutigalugu:
- Alcoa Australiami suliffeqarfeqarpoq. Suliffeqarfiit taakku alakkarukkit paasilissavat sulisut Australiamiuusut. Brasiliami suliffeqarfiutitta ilaat alakkarukku Brasiliamiut suliffeqarfigigaat takusinnaallugulu tusaasinnaassavat. Portugalimiut oqaasii Brasiliami atorneqarput, paasissutissallu portugalimiut oqaasii atorlugit allanneqartarput. Tassa nunaqavissut sulisuutigineqartut paasilissavat, Kalaallillu Nunanni aamma taamaakkumaarpoq, Wade Hughes radioaviisimut oqarpoq.
Alcoa-meersut pingasut allat peqatigalugit Sisimiut, Maniitsup aamma Nuup kommuniini aluminiumik aatsitsivimmik pilersitsisinnaanissaq pillugu paasisassarsiorniarlutik angalaqqammerput. Aluminiumik aatsitsiveqarneq nukinnik atuiffiusartorujussuuvoq, ataavartumillu nukissaqarniarneq aqqutigalugu aluminiuliorneq siunissaq ungasinnerusoq isigalugu akikinnerusarluni.
Qeqqata kommuniini illoqarfiit taaneqareersut erngup nukinganik nukiliorfeqarsinnaalluarmata tamaani aluminiumik aatsitsivissamik Alcoa pilersitserusukkaluarpoq.
Alcoa-p pilersaarutai inatsisartunit naalakkersuisunillu apriilip qaammataani sammineqartussaapput, tapersersorneqarsinnaanissartillu Wade Hughes-ip neriuutigaa:
- Torersumik iliuuseqarnikkut suliffeqarfimmik pilersitsisoqarsinnaanissaa soqutigisaraarput, Hughes oqarpoq, nangillunilu:
- Apeqqutit assigiingitsut akissutiseqqaartariaqarpagut. Naalakkersuisut akissutissanik ujartuipput, kommunillu aamma akissutissanik ujartuillutik.
Tamakku tamarmik inissinneqareerpata aatsaat ingerlariaqqissinnaassaagut, maajillu qaammataani isumaqatigiissummik atsioqatigiissinnaassalluta, Wade Hughes naggasiilluni oqarpoq.
Alcoa nunani assigiinngitsuni 44-ni suliffeqarfeqarpoq, 123.000-inillu sulisoqarluni.
Siorna isertitat 150 milliardi koruunit sinnerpaat. Aluminiuliorfissamik pilersitsisoqarnissaanik Alcoa kisimiinngilaq. Norge-meersut Hydro aamma soqutiginnipput.
