Alcoa-kkut kalaallinut sinnassaapput

- Tikipput oqarlutik aajuku suliffissasi tamannalu politikkerinit qujarunneqarpoq akileraarutitigummi isertitsissutaassammata. Kisianni illuatungaatigut isigissagutsigu nunatta pigisaanik annissuiniarput, Nuka Møller Lund oqarpoq.

Taanna isumaqarnerarpoq siullermik nunamik piginnittussaaneq inisseqqaarlugu kingorna aatsaat suut nunatsinniit annissorneqarnissaat oqaluuserineqarsinnaasariaqaraluartoq.

Aluminiuliorfik Alcoa Nuup eqqaanut inissinneqassagaluarpat ujarassuit timaani tasersuit tungaanniit Maalutup tungaanut isorartutigisoq atorneqartussanngussaaq. Tassalu imaappoq Nuummiit umiatsiaaqqamut ilaalluta ujarassuit timaani tasersuit tungaanukassagutta akunnerit pingasut atorlugit ornissavarput. Tassanngaanniilu Maalutup tungaanut 150 km missaata tungaanut isorartussuseqarpoq.

- Uagut pinialunnermik soqutigisaqaratta Nuup eqqaani nunaminertat nalunngilagut. Tasersuarlu eqqartornikuusaat ujarassuit timaaniittoq erngup nukinga atorlugu nukissiutinik aallerfiginiarpaat. Taassumalu aqqutaa Maalutup tungaanut ungasissorujussuuvoq tamaanilu napparuterpassuit napparneqartussanngussapput, Nuka Møller Lund oqarpoq.

Nuka Møller Lund isumaqarpoq taamaalilluni uumasorpassuit nunalu mingutserneqarnermikkut piuneerutsinneqarsinnaasut.

Nuka Møller Lund aperaarput Alcoamut akuersissaguni qanoq ilisoqarpat aatsaat akuersissagaluarnersoq.

- Nunamut piginnittussaaneq inissinneqaqqaartariaqarpoq mingutsitsivallaarnerlu ajortut akuerisinnaassavakka, soorlu; kuultisiornerit allallu, Alcoali pinnagu. Tassami aluminiuliorneq CO2-mik annertuallaartumik mingutsitsissaaq taannalu arrortikkuminaatsunik akulerujussuuvoq, Nuka Møller Lund oqarpoq.

Aatsitassanut ikummatissanullu Naalakkersuisoq Kim Kielsen oqarpoq qulaajagassat qulaajarneqaqqaassasut, innuttaasunillu tusarniaanerit pissasut aatsaallu tassannganniit ingerlariaqqissallutik.