Alcoa akiliinerluippat akiliilluarpalluunnit Nunatta Karsia ajungaassaaaq
Aningaasaqarneq aallaavigalugu isiginnikkaanni, taama isummerneq inuussutissarsiormut nassuiaammi naatsorsuinernit taperserneqarpoq. Naatsorsuinerimmi takutippaat, nunani allaniit suliartortut akilernerlugaangaluarpata akilernerlugaanngikkaluarpataluunniit, Nunatta Karsiani isertikkumaakkat assigiinngissuteqangaarnavianngitsut.
Qanoq pisoqarsinnaaneranik missingiussanik pingasunik Nassuiaammi saqqummiussisoqarpoq:
Missingiummi ataatsimi sulisut Nunatsinni isumaqatigiissutit naapertorlugit akissarsiaqarput, allami maani akissarsiat affaannik akissarisaqarlutik aammalu allami nunatsinni akissarsiat sisamararterutaannik akissarsiaqarlutik - tassa nalunaaquttap akunneranut 45 koruuninik.
Akissarsiat appariartortillugit Nunatta Karsiata isertitanit akileraarutitigut pissarsiaa ikiliartussapput.
Kisianni: Pissarsiarinngitsuukkat piffissap ingerlanerani pissarsiarineqassapput, piginneqatigiiffiup selskabinut akileraarutitigut akiliinerulerneratigut. Tamanna nassuiaammi peqquteqartinneqarpoq, sanaartornermi aningaasartuutit ikinnerunerisigut, piginneqatigiiffiup akileraarnermi ilanngaatigisinnaasai ikinnerussammata.
Tassalu naatsorsuinerit naapertorlugit Nunatta Karsiani pissarsiassat assigiinginnapajaassapput, apeqqutaanani nunani allamiut akilernerlullugit akilernerlunnagilluunnit sulisinneqarnersut.
Missingiilluni naatsorsuinerit takutippaat, nunani allaniit suliartortut nunatsinni isumaqatigiissutit tunngavigalugit akissarsiaqarpata imaluunniit nalunaaquttap akuneranut 45 koruuninik akissarsiaqarpata, Nunatta Karsiani isertitassat assigiinngissutaat 3 millioni koruuniinnaasut.
Nassuiaammi erseqqissarneqarpoq, Qanoq pisoqarsinnaaneranik missingiussanik takutitsissutissaannaasut, akissarsiallu qanoq ikkumaarnerannik takutitsisuunatik.
Naalakkersuisut aamma allapput, issuarlugu: "Nunatsinni inuiaqatigiit aningaasaqarnerannut annertunerpaamik pissarsititsisussaq tassaassaaq akileraarutitigut iluanaarutit aammalu toqqaannartumik suliffeqarnermi inuit isertitaat, suliassat nassatarisaattut naatsorsuutigineqartut."
Aammali inuussutissarsiornikkut ingerlatassat angisuut pillugit nassuiaammi inassutigineqarpoq, nunai allaniit suliartortut nunatsinni innuttaasuniit akileraarutinut akiliutikinnerussasut.
Tassami inuit akileraarutaat nunani allani, Nunatta inuussutissarsiornikkut sanillersuuffigerusutaani akileraarutinut naleqqiullugit qaffasinnerusut, Naalakkersuisut isumaqarput.
Maniitsup eqqanni aluminiumik aatsitsivissap sananerani inuit 2.600 sulisorineqarnissaat naatsorsuutigineqarpoq, sananerlu ukiunik tallimaniit arfineq marlunnit sivisussuseqassasoq.