Albrechtsen: Statsministeri nassuiaateqartariaqarpoq

Kalaallit Nunaata Danmarkip naalagaaffianut 1953-mi ilanngutsinneqarnera pillugu taamani naalakkersuisut salluliorsimanerannik pasilliutit pillugit statsminister Anders Fogh Rasmussen Folketingimut juullertinnagu nassuiaateqartussanngorpoq. Nassuiaasoqarnissaanik piumasaqartut ilagaat Enhedslistenimeersoq Keld Albrechtsen.

Siunissaq naalagaaffeqatigiinnerullu nutarterneqarnissaa kiisalu namminersorneq pillugu ataatsimiititaliap siunnersuutai savalimmiormiut kalaallillu Danmarkimut isumaqatigiinniutigilerpatigik pisimasut naammassillugit qulaajarneqareersimanissaat kissaatiginerarpaa. Nalunaarummi pineqartut naammassillugit oqaluuserineqapallanngippata oqallinnissaraluit allat maangaannartalernissaat pinngitsoortinniarlugu piaartumik aaqqiisoqartariaqartoq Keld Albrechtsen isumaqarpoq. Taamatuttaaq kalaallit inuiattut akuerineqarsinnaanerannut kiisalu nunani allanut tunngasuni kalaallit namminneq oqartussaalernissaannut, soorlu arfanniarneq pillugu oqartussaalernissaanut tunngasut naammassillugit oqaluuserineqartariaqarsorai. Paasissutissat siornatigut saqqummiunneqarsimanngitsut Atlantikup Avannaani Suleqatigiit nalunaarusiarititaani novemberimi saqqummiunneqarput.