Alaskap nannut ilannguteqqunngilai
Nannut nungukkiartulernerat oqariartuutigalugu issittup nanuata uumasut nungukkiartulersut allattorsimaffiannut ilanngunneqarnissaa, USA-mi naalagaaffimmi pissutsinut ministereqarfiup aalajangiuppaa.
Allattoq Louise M. Kleemann
maajip 26-at 2008 07:17
Allattorsimaffimmulli ilanngunneqarnissaanut takussutissat naammannginnerarlugit Alaskap guvernøriata Sarah Palinip naalagaaffimmi pissutsinut ministeri Dirk Kempthorne eqqartuussisulersuunniarpaa.
Aviisip USA Today-ip nittartagaani tamanna atuarneqarsinnaavoq.
Nannut annertunerusumik eqqissisimatitaalissappata amerliartulissapput, uuliasiorfinnullu akornutaalissallutik, taamaammat piniarneqarsinnaasariaqartut Sarah Palinip oqaatigaa, qinikkallu Alaskameersut allat peqatigalugit ministerimik eqqartuussisulersuussiniarluni.
Uuliasiorfiit amerikap nunavittaata avannamut imartaaniittut nannunit akornusersorneqarsinnaanissaat matumani pineqarput, uuliasiorfiit Beaufortip Tjukterillu imartaaniittut eqqarsaatigineqarlutik.
