Alaskap kitaani imaq qaffakkiartorpoq
Alaskap kitaani nunaqarfeeqqat Berinngip kangerliumarnganut sineriaqartut 213-iusut amerlanersaat sissap immamit neriortuarneqarluni tiffariartuinnarneranit ulorianartorsiortinneqarput, taama Nunatsiaq News-mi aallaarisaqarpoq.
Nunaqarfeeqqat amerlanersaat nunap inuiinit najorneqarput, nunaqarfiillu sisamat sissap tiffaraluttuinnarneranit ulorianartorsiorluinnartut oqaatigineqarluni. Nunaqarfik Shishmarif Alaskap avannaata kitaani sineriappasissumiittoq 600-inik innuttaqartoq ulorianartorsiornerpaavoq, nunaqarfiullu allamut nuutsinneqartariaqalernissaa Alaskami oqartussanit maanna misissorneqarpoq.
Shishmariffip illui 150-it tiffasinnerusumut nuunneqassappata tamanna 112 mio.koruuninik akeqassasoq oqaatigineqarpoq. Tamatuma saniatigut napparsimmaviup atuarfiup qatserisarfiup allaffeqarfiullu nutaamik sananeqarnissaat 145 mio.koruunit sinnerlugit akeqassasoq oqaatigineqarluni. Tamakku saniatigut aamma nutaamik aqquserngiornissaq erngup innaallagissallu aqqusiornissaq timmisartoqafissarlu eqqarsaatigineqassapput. Shismaf immap qaffasinnerulerneratigut piuneerussaassangatinneqartup innuttaasa Alaskami illoqarfimmut Nomemut aamma nuutsinneqarnissaat eqqartorneqarpoq.
