Alaskap issittortaani nunap ilaa uuliasiorfigeqqusaajunnaarluni eqqissisimatitaalersoq
![](/sites/default/files/styles/image_934x467/public/article_images/alaska_natur.jpg?itok=oIwe0jNb)
Tassani pineqarpoq nunarujussuaq 52.000 kvadratkilometerisut angitigisoq. Danmarkimiit 10.000 kvadratkilometerinik anginerusoq.
Aviisi Globe and Mail naapertorlugu præsident Obama sapaatiummat nalunaaruteqarpoq nuna eqqissisitassaq The Arctic National Wildlife Refugeemiittoq uumasorpassuarnut illersorneqartariaqartunut angerlarsimaffiusoq; soorlu nannunut, tuttunut, timmiarpassuarnut aalisagarpassuarnullu.
Republikanerit inatsisartuniittut arlallit akerliunertik nalunaarutigereerpaat, taamaattumillu imaassinnaavoq inatsisartuni akuersissutigitinnissaa ajornakusoorsinnaasoq. Præsidentilli oqaaseqarnera nunamullu namminermut ministereqarfiup nalunaaruteqarnera akerliusoqaraluarpalluunniit nunatut eqqissisimatitatut siunniunneqartut atuutsinneqalissapput.