Alaskap illoqarfiisa pingaarnersaat, nunap inoqqaavinit najugaqarfigineqarnerpaajuvoq
Amerlasuunit tupaallaatigineqassagunartutut Anchorage, Alaskami Inuppiaat Yuppillu illoqarfiisa annersarilerpaat. Inuppiat nunaqarfiini angisuuni marluusuni, tassa Kotzebuemi aamma Barrowimi, kalaallisut Marraarniarfimmi, aamma Yuppiit illoqarfianni angisuumi Bethelimi, inuunerup allanngorujussuarsimanera, tamatumunnga pissutaavoq, amerliartuinnartullu, pingaartumik inuusuttut, illoqarfissuarnut, soorlu Anchoragemut, nutserarmata. Suliffiit tamaani pitsaanerupput, ajunnginnerusumik ilinniagaqarsinnaapput unammillernartullu ullutsinnut naleqquttut amerlanerullutik.
Yuppit Alaskami najugallit 27.000-it missaanniipput. Nunap inuiini naalagaaffimmi tassani amerlanersaallutik. Amerlanersaat Beringstrædip sineriaani najugaqarput, tallimararterutaalli Anchoragemut maanna nuussimapput. Inuppiaat, nunap inuiini naalagaaffimmi najugallit amerlanersaasa tullii, Ungalaqliit avannaanni issittullu imartaata sineriaani najugaqarput, tassa Yuppikkutulli nutserarlutik. Naatsorsueqqissaartarfinni kisitsisaatigineqartut ersersippaat, Inuppiaat 21.000-it inulaarlugit amerlassuseqartut, taakkulu tallimararterutaat Anchoragemi najugaqartuusut.
Naggueqatigiit taakku marluk aatsaavik immikkut naatsorsorneqarput. Inuit kingullermik 2000-imi kisinneqarmata naggueqatigiit taakku ataatsimut naatsorsorneqarput, eskimonillu taagorneqarlutik, taaguullu taanna USA-mi suli atorneqarpoq.
Inuppiaat Yuppillu naalagaaffimmi indianerit assigiinngitsut naatsorsoraanni marloriaammik amerlanerupput.
Kisitsisillu nutaat takutippaat oqaasinnaaq qanganisaq ilumoortoq. Qangalimi oqallisaasarpoq Anchorage naalagaaffimmi nunap inuiinit najugaqarfiit annersarigaat, kisitsisillumi nutaat tamanna uppernarsarpaat.
