Alaskamiit Nuummut ulluni pingasuni ingerlaarpoq
ICC-p ataatsimeersuarnera aqagu alllartissaaq. Ualip ingerlanerani atatsimiinnermi peqataajartorlutik tikittut kulturikkut illorsuarmi Katuami allatsipput nalunaarsorneqarlutillu, inissaminnullu innersuunneqarlutik.
Alaskamit peqataasussat 102-nik amerlassuseqarput, taakkua ilaat ualimut tikittoq Clarence Itta Alaskami Barrow-imeersoq oqaloqatigaarput:
- Aatsaavissuaq Kalaallit Nunaanniippunga qilanaarpungalu. Kulturit allat takussallugit pissanganartarpoq aammalu assigiissutsit takussallugit qilanaarnarluni. Silap pissusaa uagut nunagisatsinnut assinguvoq, maannakkummi Barrow-imi seqineq kaaviinnarpoq. Nuummiinnera nuannaarutigaara, Clarence Itta oqarpoq.
Clarence Itta ualimut Nuummut tikippoq. Sisamanngormat ullaap tungaani nunagisaminit Barrow-imit Nuummukarluni aallarpoq. Barrow Alaskami illoqarfiit avannarlersaraat.
Clarence Itta Inuit Issittormiut Siunnersuisoqatigiiffiata ataatsimeersuartitsineranut aatsaat peqataalinnngilaq. Taamaammat ICC-p ataatsimeersuartitsisarneranut peqataalluni pissanganartuaannarnerarpaa.
- Inuit assigiinngitsut issittumi najuaqartut naapittarnissaaat pingaaruteqarpoq, uagutsinnut pingaaruteqartut oqallisigalutigit, soorlu avataangiisit pillugit oqallinnissaq pingaaruteqartoq, taannalu pillugu oqallinnissaaq qilanaarivara, Clarence Itta oqarpoq.
Uuliamik ujaasilluni qillerinissat ICC-p ataatsimersuarnerani oqaluuserineqarnissaat aamma pingaaruteqartoq, Clarence Ittap oqaatigaa.
- Immami uuliamik ujaasilluni qillerinerit oqaluuserineqarnissaat uagutsinnut pingaaruteqarluinnarpoq. Pingaartumik eqqarsaatigalugu Mexicop kangerliumanersuani uuliasiorfimmi ajunaarnerup kingorna Alaskami uuliasiornermi isumannaallissaaneq pingaaruteqarnerujussuanngorpoq. Alaskami uulisiornermi ajutoortoqarsinnaanera annilaanngatigarput, Clarence Itta oqarpoq.
Clarence Itta ullut pingasut Nuummut apuunniarsarivoq. Angalanermini ulloq siulleq Barrow-imiit Alaskami illoqarfimmut Anchorage-mut timmisartorpoq. Anchorage-miit Canadami illoqarfimmut Edmontonimut ingerlaarluni, tasssanngaaniilu Canadap issittortaani illoqarfimmut Churchilimut ingerlaarluni.
Churchill-imimiit akitsinniittumut Eqalunnut ingerlaarpoq, tassanngaanniit Kangerlussuarmut timmisartoriarluni Clarence Itta Nuummut ualimut tikippoq.
